Qeveria pranon se me rritjen e çmimit të naftës, ka ndikuar dhe te çmimet e produkteve ushqimore. Në një konferencë për mediat, ministrja e Ekonomisë Delina Ibrahimaj shpjegoi se po vijohet me monitorim ditor në mënyrë që të frenohen abuzimet.
“Sa u takon ushqimeve, ne po monitorojmë një shportë me 80 ushqime dhe e vërteta është që kanë filluar të reflektohen në disa prej produkteve të shportës çmimet e rritura. Do të aktivizojmë një ekip, disa grupe monitorimi nga Inspektorati Shtetëror i Mbikëqyrjes së Tregut për të verifikuar këto çmime sepse ne kemi përzgjedhur në bashkëpunim me INSTAT këtë listë produktesh dhe një numër të limituar të tregtarëve. Tani do të dalim në terren për të monitoruar çmimet dhe reflektimin e furnizimeve me realitetin”, tha Ibrahimaj.
Duke u ndalur te çmimi i naftës, ministrja theksoi se vendosja e një çmimi tavan nga Bordi i Transparencës erdhi sepse tregtarët nuk reflektuan uljen në bursa.
“Për mosreflektimin nga ana e tregtarëve, është sepse pardje pati një rënie të bursë dhe dje pati një rritje përsëri të saj. Bursa po luhatet me baza ditore. Ne kemi ekip që përditë monitoron jo vetëm çmimet e burës, jo vetëm në fund por dhe gjatë ditës edhe çmimet e tabelës me qëllim që të jemi të vëmendshëm nëse ka luhatje apo nevojë për ndërhyrje”, tha ministrja.
Gjatë konferencës, Ibrahimaj bëri të qartë se bordi do të qëndrojë në fuqi derisa çmimet të rikthehen në nivelin e periudhës para luftës.
