Shqipëria mundi 2 me 0 Bullgarinë në sfidën miqësore, të luajtuar në stadiumin kombëtar në Tiranë. Entuziasmi i sukseseve në duelet eliminatore shoqëroi të besuarit e Sylvinjos edhe në këtë sfidë miqësore. Pavarësisht se në formacionin titullar pati rrotacion, kuqezinjtë luajtën përgjithësisht mirë dhe shënuan nga një gol për secilën pjesë.
Në minutën e ’41 një aksion model me protagonist Mihajn dhe Uzunin, i dha mundësi mesfushorit Qazim Laçi që të realizonte golin e avantazhit, duke ngritur peshë entuziasmin e tifozëve në stadium. Në pjesën e dytë bullgarët u përpoqën të ishin kërcënues në portën e Strakoshës, por nuk e arritën dot të krijonin raste të pastra për shënim. Ndërsa Shqipëria shfrytëzoi një veprim klasi individual të Ernest Muçit për të dyfishuar rezultatet në minutën e 80-të. Talenti kuqezi goditi fort dhe bukur nga distanca me të djathtën në ecje e sipër duke mposhtur portierin kundërshtar.
Kuqezinjtë rikthehen në fushë në mesin e muajit nëntor në dy duelet e fundit kualifikuese të vlefshme për Euro2024. Shqipërisë i mjafton një pikë që në sfidën e parë kundër Moldavisë për t’u kualifikuar në këtë kompeticion.
