Teksa qëllimet e presidentit amerikan Donald Trump lidhur me skenarët e një sulmi të mundshëm ndaj Iranit mbeten ende të paqarta, Komanda Qendrore e SHBA-së (CENTCOM) njoftoi se Forca e Nëntë Ajrore Luftarake, e njohur si Air Forces Central (AFCENT), ka nisur një stërvitje ajrore disaditore në Lindjen e Mesme.
Stërvitja synon të demonstrojë aftësinë e forcave ajrore amerikane për të vendosur, shpërndarë dhe mbështetur avionë luftarakë në zonën e përgjegjësisë së CENTCOM-it, e cila përfshin Lindjen e Mesme, Azinë Qendrore dhe Azinë Jugore.
Sipas një deklarate zyrtare, stërvitja do të shërbejë për testimin e procedurave të lëvizjes së shpejtë të personelit dhe avionëve, operacioneve në lokacione emergjente të shpërndara, mbështetjes logjistike me kapacitete minimale, si dhe integrimit të komandës dhe kontrollit shumëkombësh në një zonë të gjerë operacionesh.
U.S. Air Forces Central will be conducting a multi-day readiness exercise to demonstrate the ability to deploy, disperse, and sustain combat airpower across the U.S. Central Command area of responsibility.
Read more: https://t.co/F4rRENnVGD pic.twitter.com/ny80gdjuQU
— U.S. Central Command (@CENTCOM) January 27, 2026
AFCENT bën të ditur se gjatë stërvitjes, forcat amerikane do të dislokojnë ekipe në vende të ndryshme emergjente dhe do të verifikojnë procedurat e shpejta të vendosjes, operimit dhe rikuperimit të avionëve, duke përdorur paketa të vogla, por efektive mbështetëse.
Të gjitha aktivitetet do të zhvillohen me miratimin e autoriteteve kombëtare dhe në bashkëpunim të ngushtë me autoritetet civile dhe ushtarake të aviacionit, me theks të veçantë në sigurinë, saktësinë dhe respektimin e sovranitetit kombëtar.
Kjo stërvitje vjen një ditë pasi CENTCOM njoftoi mbërritjen në Lindjen e Mesme të aeroplanmbajtëses USS Abraham Lincoln, së bashku me anijet luftarake shoqëruese.
Forcimi i pranisë ushtarake amerikane në rajon, si dhe deklaratat e Donald Trump në mbështetje të protestuesve kundër regjimit iranian, janë interpretuar nga analistët si përgatitje për një sulm të mundshëm ndaj Republikës Islamike të Iranit.
Megjithatë, një ditë më parë, presidenti amerikan deklaroi se Teherani është “i gatshëm për dialog”.
“Ata duan të bëjnë një marrëveshje. E di këtë. E kanë kërkuar shumë herë, duan të flasin”, tha Trump për Axios, pa dhënë detaje mbi opsionet që po “shqyrton” apo cilin prej tyre preferon.
Sipas New York Times, agjencitë amerikane të inteligjencës e kanë informuar vazhdimisht Trumpin se regjimi iranian po dobësohet dhe se ndodhet në gjendjen më të keqe që nga rënia e Shahut në vitin 1979. Senatori republikan Lindsey Graham i tha gazetës se ka komunikuar shpesh me Trumpin ditët e fundit, duke theksuar se “qëllimi është fundi i regjimit”.
Nga ana iraniane, ndonëse diplomacia ka lënë të kuptohet se ekziston një kanal komunikimi i hapur me SHBA-në, toni zyrtar është zbutur vetëm pjesërisht ditët e fundit.
Sot, zëdhënësi i Gardës Revolucionare paralajmëroi se “nëse aeroplanmbajtësja bën një gabim dhe hyn në ujërat territoriale iraniane, ajo do të vihet në shënjestër”.
Ndërkohë, një gazetë vendase iraniane shkroi se Irani është gati për një “përgjigje të fortë” dhe se mund të marrë kontrollin e Ngushticës së Hormuzit, një arterie jetike për transportin global të naftës dhe gazit natyror të lëngshëm.
