Tensionet mes Shteteve të Bashkuara të Amerikës dhe Kubës janë rritur, pasi Sekretari amerikan i Shtetit, Marco Rubio, e ka cilësuar ishullin si “kërcënim për sigurinë kombëtare” dhe ka deklaruar se gjasat për një marrëveshje paqësore mes dy vendeve janë të ulëta.
Deklaratat e Rubios vijnë vetëm një ditë pasi autoritetet amerikane ngritën akuza ndaj ish-presidentit kuban Raúl Castro, lidhur me rrëzimin e dy avionëve në vitin 1996, ngjarje që la të vdekur katër persona, përfshirë shtetas amerikanë.
SHBA pretendon se vendimi për rrëzimin e avionëve u mor ose u miratua nga nivelet e larta të pushtetit në Kubë.
Nga ana tjetër, Havana zyrtare i ka mohuar akuzat, duke i quajtur ato të motivuara politikisht. Ministri i Jashtëm kuban, Bruno Rodríguez, ka deklaruar se Kuba nuk përbën kërcënim për SHBA-në dhe ka akuzuar Uashingtonin për “gënjeshtra” dhe presion politik ndaj vendit të tij.
Rubio, megjithatë, tha se SHBA preferon ende një zgjidhje diplomatike, por theksoi se në kushtet aktuale kjo është pak e mundshme. Ai gjithashtu akuzoi Kubën si një nga mbështetëset e aktiviteteve të rrezikshme në rajon, akuza që Havana i ka mohuar kategorikisht.
Marrëdhëniet mes dy vendeve mbeten të tensionuara prej dekadash, ndërsa Kuba po përballet edhe me një krizë ekonomike, përfshirë mungesa karburanti, ndërprerje të energjisë elektrike dhe mungesë ushqimesh. Autoritetet kubane fajësojnë sanksionet amerikane për situatën.
Ndërkohë, presidenti amerikan Donald Trump ka deklaruar se administrata e tij po kërkon të ndihmojë Kubën në baza humanitare, por ka lënë të kuptohet se Uashingtoni synon gjithashtu ndryshime politike dhe ekonomike në ishull.
