Një avion luftarak rus hodhi një bombë në një qytet rus me më shumë se 400,000 banorë të enjten vonë, duke lënë një krater 40 metra të gjerë, raportojnë mediat ndërkombëtare.
Mësohet se si pasojë e këtij shpërthimi u dëmtuan disa ndërtesa në zonë.
Mediat shtetërore e konsideruan këtë incident si një lëshim urgjent të mjetit ajror.
Një avion rus Su-34, një gjuajtës-bombardues me dy motorë, lëshoi municionin mbi qytetin e Belgorodit, 40 kilometra në veri të kufirit me Ukrainën, sipas raporteve nga agjencitë shtetërore të lajmeve RIA Novosti dhe TASS.
“Rreth orës 22:15 me orën e Moskës, më 20 prill, kur një aeroplan Su-34 i Forcave Ajrore Ruse po kryente një fluturim mbi qytetin e Belgorodit, ndodhi një lëshim urgjent i një municioni ajror,” citoi TASS Ministria e Mbrojtjes ruse.
“Kjo ndodhi në kryqëzimin e njërës prej rrugëve qendrore, duke lënë një krater të madh me ndikim me një rreze prej 20 metrash,” tha Vyacheslav Gladkov, guvernatori i rajonit Belgorod, në një postim në Telegram.
Kryetari i bashkisë së Belgorodit Valentin Demidov shkroi në kanalin e tij Telegram se disa ndërtesa u dëmtuan nga shpërthimi.
Dy persona u raportuan të plagosur nga shpërthimi, tha Gladkov.
Rajoni i Belgorodit ka qenë skena e disa shpërthimeve dhe bombardimeve që nga pushtimi i Rusisë në Ukrainën fqinje në shkurt 2022.
