Punimet në aksin rrugor Lozhan–Strelcë po vijojnë pa ndërprerje që prej datës 28 janar, si pasojë e problematikës së krijuar nga një masiv shkëmbor, bën me dije Prefektura e Qarkut Korçë në një njoftim zyrtar.
Sipas Prefekturës, ndërhyrjet për thyerjen, stabilizimin dhe pastrimin e masivit shkëmbor po monitorohen në mënyrë të vazhdueshme nga strukturat përgjegjëse, në bashkëpunim me specialistë të kontraktuar nga ARRSH – Drejtoria Qendër-Lindje. Prioritet absolut mbetet garantimi i sigurisë së përdoruesve të rrugës dhe banorëve të zonës.
Autoritetet sqarojnë se ndërhyrja kërkon kohë dhe kujdes maksimal për shkak të përbërjes dhe fortësisë së masivit shkëmbor, ndaj punimet po kryhen në kushte të kontrolluara teknike dhe sigurie, me qëllim shmangien e çdo rreziku të mundshëm.
Prefektura thekson se puna po vijon intensivisht për zgjidhjen përfundimtare të situatës, ndërsa gjendja në terren po ndiqet hap pas hapi.
Në përfundim, qytetarëve u kërkohet mirëkuptim dhe respektim i sinjalistikës rrugore dhe masave të sigurisë, duke garantuar se institucionet përgjegjëse do të informojnë në mënyrë transparente për çdo zhvillim të mëtejshëm.
/vizionplus.tv
