Rama: Progresi i Shqipërisë matet me reforma, këtë e tregon mbyllja e një tjetër kapitulli me BE
Kryeministri Edi Rama, në konferencën e përbashkët për mediat me Komisioneren Europiane për Zgjerimin, Marta Kos, dhe Ministrin e Shtetit për Çështjet Europiane dhe Mbrojtjen të Irlandës, Thomas Byrne, deklaroi se Shqipëria është falënderuese për mbështetjen që ka marrë në rrugëtimin drejt BE-së.
Rama tha se është falënderues për vlerësimin e reformave që janë bërë në vendin tonë, të cilat dëshmohen edhe nga mbyllja e Kapitullit të 20-të.
Më tej, kryeministri Rama theksoi se Shqipëria do të ketë të tjera arritje shumë shpejt.
“Edhe njëherë faleminderit, i dashur Thomas, faleminderit, e dashur Marta. Sot Shqipëria ka hedhur një tjetër hap vendimtar drejt vendit të saj të drejtë në BE. Mbyllja e Kapitullit të 20-të është një njohje e reformave që ka realizuar Shqipëria. Në vijim të vlerësimit pozitiv të IBAR-it, Kapitulli i 20-të bëhet kapitulli i katërt që mbyllet brenda pak muajsh.
Le të punojmë së bashku, le ta tundim këtë shtëpi dhe ta bëjmë realitet. Ne jemi të vetëdijshëm se progresi nuk matet me kapituj të mbyllur. Progresi matet me reformat e realizuara dhe rezultatet e prekshme që janë arritur.
Falënderime nga zemra për presidencën irlandeze, për Komisionin Europian, Martën dhe të gjitha vendet anëtare për besimin dhe mbështetjen përgjatë gjithë procesit. E dimë që kemi ende një rrugë të gjatë për të bërë, por jemi të përgatitur për t’ia dalë. Pres me padurim që të mbahet Samiti i ardhshëm i Planit të Rritjes në Tiranë. Deri atëherë do të kemi bërë më shumë progres”, tha Rama.
