Kryetari demokrat Lulzim Basha e vlerëson dorëheqjen e kreut të SHISH Visho Ajazi Lika, si të detyruar pas presionit politik. Edhe pse pranoi se nuk ka informacione konkrete, Basha tha se puna e SHISH gjatë drejtimit të Visho Ajazi Likës, ka vënë në panik qeverinë, e cila është vënë në lëvizje për të mbyllur çështjen “Tahiri”.
“Një gjë është e sigurt; një Shërbim Informativ i cili harton raporte për përfshirjen e Policisë në kultivimin dhe trafikimin e drogës, siç ka bërë SHISH prej dy vitesh, është halë në sytë e narko-shtetit dhe të Edi Ramës. Ndaj nuk mund të ketë konkluzion tjetër përveçse presionit politik. Kjo tregon që narko-shteti është në panik total dhe po bën gjithçka për të mbyllur aferën e Samir Tahirit. Por e kundërta do të ndodhë. Kësaj afere do t’i shkohet deri në fund. Saimir Tahiri nuk do t’i shpëtojë drejtësisë. Kjo është e sigurt!”
Pas mbledhjes së grupit parlamentar, Basha tha se aksioni opozitar do të vazhdojë deri në arrestimin e ish-ministrit Tahiri, i cili për kreun e opozitës është i përfshirë në trafikun e drogës.
“Kërkesa jonë e pandryshuar, e cila sot ka mbështetjen e gjithë botës perëndimore është që Edi Rama të mos ushtrojë presion ndaj Prokurorisë dhe të mos përdorë imunitetin parlamentar për të mbrojtur Tahirin nga kërkesat e drejta të Prokurorisë. Saimir Tahiri duhet të arrestohet. Përdorimi i imunitetit parlamentar për të ndalur arrestin e Saimir Tahirit bëhet vetëm për të mbrojtur atë dhe bashkëpunëtorët e tij, duke përfshirë Edi Ramën.”
Basha ripërsëriti apelin drejtuar faktorit ndërkombëtar, për të përmbysur sipas tij, kupolën mafioze në pushtet.
