PS-ja në kërkim të 84 votave, Rama dhe Balluku mbërrijnë në Kuvend mes tensioneve
Kryeministri Edi Rama dhe Belinda Balluku kanë mbërritur në Kuvend, pas tensioneve të krijuara në nisje të seancës plenare të ditës së sotme.
Më herët, me 80 vota pro, projektligji për Bankën e Shqipërisë u hoq nga rendi i ditës, pasi mazhorancës i nevojitet shumica e cilësuar për miratimin e tij.Socialistëve u mungojnë katër vota për të siguruar këtë shumicë.
Seanca plenare nisi mes përplasjeve mes mazhorancës dhe opozitës. Deputetët e Partisë Demokratike hynë në sallë me pankarta të lidhura me protestat e zhvilluara gjatë dy javëve të fundit.
Teksa kryetari i Kuvendit, Niko Peleshi, po prezantonte rendin e ditës, deputetët e opozitës përplasnin duart në tavolina dhe bllokuan foltoren, duke penguar zhvillimin normal të seancës. Protesta e tyre lidhet me kundërshtimin ndaj asaj që e cilësojnë si dhunë policore ndaj të rinjve gjatë protestave.
Mbërritja e Ramës dhe Ballukut vjen në një seancë të shoqëruar me tensione politike dhe debate mes palëve, ndërsa mbetet për t’u parë vijimi i punimeve të Kuvendit.
/vizionplus.tv
