Partia Demokratike ka nisur protestat kundër qeverisë për herë të parë pas humbjes së zgjedhjeve parlamentare të 11 majit.
Në protestën para kryeministrisë, ka mbajtur fjalën edhe kreu i PD-së, Sali Berisha.
Ai tha se nga 10 seanca në Parlament, opozita u lejua të dëgjohet vetëm në njërën nga to.
Sipas Berishës, kjo ndodhi sepse Rama ka frikë nga përballja me PD dhe qytetarët. Kreu i PD u ndal edhe te mungesa e ilaçeve në QSUT, duke e quajtur një krim.
Berisha: Ajo që kulmoi në qëndrimet e narko-shtetit ishte mbyllja de facto e narko-parlamentit. Edi Rama dhe banda e tij të dalë nga grabitja e votës, nga paratë e drogës, nga aferat më të mëdha korruptive. Opozita u lejua të debatojë në vetëm 1 seancë, në 10 seanca parlamentare. Qeveria e përbërë nga individë të krimit, u votua për 28 minuta, për të treguar se ata kanë frikë dhe tmerr nga ju. Ai s’del dot para jush.
Në 10 seanca u hodh poshtë kërkesa për Komisionin e Zgjedhjeve. Edi Rama është po aq fajtor, po aq i korruptuar sa vetë McGonigal. U hodh poshtë interpelanca me ministren e Shëndetësisë. Edi Rama iu thotë shqiptarëve se të sëmurët me kancer mbetën pa mjekime se ata ishin shumë dhe ne s’kishim para. A ka krim më të shëmtuar se kaq? Para kishte, dhe jo vetëm aq, por ju garantoj unë edhe 10 herë më shumë. Në mungesë të atyre ilaçeve përbën një krim të vërtetë. Ato para i rrëmben Edi Rama për t’i transportuar me avionin e tij. Paratë i përdor për të udhëtuar, për të kënaqur sytë e tij. Paratë i përdor për të blerë vetura super luksoze, super të shtrenjta. Paratë i transporton ai me avionin e tij. Nuk ka pafytyrësi më të madhe se kjo që bëre ti. E mbylle parlamentin se do që këto mos t’i thuhen në sy, mos t’i marrin vesh qytetarët.
/vizionplus.tv
