SPAK ka trazuar sërish ujërat e politikës ditën e sotme, duke sjellë sërish reagime të shumta. I ftuar në studion e “Quo Vadis” të moderatores Pranvera Borakaj në Vizion Plus, gazetari Poli Hoxha tha se sot në Shqipëri politika, krimi dhe korrupsioni janë të pandara nga njëra-tjetra.
Ai tha se kjo shihet qartë edhe në atë që po ndodh brenda PD-së, ku sherri më i madh mes zyrtarëve të lartë në selinë blu është se kush mbështete te i shumëkërkuari Suel Çela.
“Jemi në një periudhë të re. Kush është me përvojë dhe e di që krimi i organizuar u bë në biznes, dhe ne sot i quajmë biznesmenë këta. Është ngritja cilësore e krimit shqiptar. Çfarë ka ndodhur? Edhe politikës i pëlqen të thotë që SPAK po punon mirë me krimin e organizuar, ka ca arritje, edhe shteti për narkoshtetin dhe trafiket, por kur vjen puna te korrupsioni, duket sikur është gjë tjetër. Kjo prokurori ka 2 seksione, krimi i organizuar dhe korrupsioni. Kur u morën 4 kandidatët për kreun e SPAK, ishte interesante pyetja kush do të jetë përparësia juaj në SPAK, krimi i organizuar apo korrupsioni, tre nga ata thanë që janë njësoj, dalloi Braho. Ai i bëri organike, sepse tha krimi i organizuar ushqen korrupsion dhe anasjelltas. Kush i jep lejet e ndërtimit për krimin? Kush i jep resortet? Politika. Aq shumë të lidhur janë, dhe publiku i shikon më hapur gjatë zgjedhjeve sepse vrapojnë t’i akuzojnë. Kur vjen puna tani po del zyrtarisht që ata janë bashkë, nuk mundet të shkojnë veç e veç, madje edhe një pjesë e medias. Ne aktualisht jemi në fazën e trajtimit të këtij lloji. Sot në rastin e Agasit kemi për herë të parë AKSHI-n dhe akuza është grup i strukturuar kriminal. E di kush është në një parti si PD, që është në opozitë dhe kërkon të vijnë qytetarët në protestë. Dhe ka plasur një debat atje se kush e ka sjellë Çelën. Akuzohet Salianji që Suel Çela i organizon takimet, Salianji ju kujton që Suel Çela ju ka sjellë njerëzit në stadium”, tha Hoxha.
