Ish-kryetari i Shërbimit Informativ Shtetëror, Fatos Klosi komentoi nismën e qeverisë për të luftuar krimin përmes paketës “Anti-KÇK”. Në një intervistë për “Vizion Plus”, Klosi akuzoi opozitën se po e kundërshton këtë operacion vetëm për të bërë politikë.
“Opozita po bën politikë. Kështu kanë bërë deri tani. Opozita punon për hesapin e saj. Nuk punon për këtë vend, punon për hesapin e saj. Unë kështu e shoh.”
Duke e ndalur theksin tek e drejta e Policisë së Shtetit për të kryer përgjime ambientale, Klosi tha se nuk ka asnjë rrezik në këtë pjesë. Sipas tij, kjo është një detyrë normale dhe nuk ka asnjë problem sepse gjithçka do të shkojë në fund në gjykatë nëse ka prova.
“Për mua nuk përbën rrezik. Rrezik për çfarë? Gjykatës i merret leje atëherë kur përgjigjet pretendohen se do të jenë prova në gjyq. Përgjimet që do të vijnë nga kjo metodë e re do të përfundojnë në gjykatë. Do të ketë një proces gjyqësor normal për atë problem. Mua më duket më shumë që gjëja bëhet kot. Eskpertët kanë të drejtë, por edhe ata janë të ndarë në disa që mbrojnë qeverinë dhe në atë që nuk e mbrojnë.”
Ish-kreu i SHISH theksoi se struktura e re (OFL) duhet të provohet më parë dhe më pas të flitet nëse është e suksseshme apo jo dhe nëse e bëri punën siç duhet.
“Unë shpresoj që kjo strukturë të funksionojë. Më duket sikur po bëhen avokatë të krimit, është term që e përdori kryeministri, por po e përdor edhe unë. Të fgjithë që e kundërshtoijnë këtë ligj. A ka probleme me krimin? Ka pafund. Por le ta provojmë. Unë këtë opinion kam me eksperiencën që kam. E tregon puna më pas nëse e bën mirë apo nëse nuik e bën. Ishte ligji antimafia, por nuk u zbatua. Ne ligjet po përpiqemi t’i përshtasim me Evropën. Përpiqemi që të marrim shembujt më të mirë. Ligjet janë publike sepse dalin në Parlament, votohen. Problemi është që kanë ngecur në zbatim. Nuk zbatohen ashtu siç janë shkruar. Dhe po bëhet një provë. Le të provohet dhe pastaj të kundërshtohet nëse nuk shkon. Të bësh teori që në fillim nuk shkon. Kemi 30 vjet që themi jo s’është kështu, është ashtu.”
