Ish-kryeministri i Maqedonisë, Nikola Gruevski, dyshohet të jetë ndihmuar nga organet hungareze për të hyrë në Hungari ilegalisht nëpërmjet Shqipërisë, Malit të Zi dhe Serbisë.
Sipas portalit investigues hungarez, Atlatszo, ka mundësi që Gruevski të jetë nisur të mërkurën për në Hungari, me një avion privat të kryeministrit Viktor Orban që e përdorin edhe biznesmenët e afërt me të.
Të mërkurën, ky avion i tipit JET, sipas mediave ka marrë Gruevskin në Beograd dhe e ka dërguar atë në Budapest ilegalisht, pasi për të hyrë në një vend anëtar të Bashkimit Europian i nevojitej pasaporta të cilën ia kishin konfiskuar në Shkup. Në këtë mënyrë sipas mediave qeveria e Hungarisë ka shkelur ligjin hungarez.
Ndërkohë është konfirmuar se Nikolla Grevski hyri në territorin e Shqipërisë dhe me ndihmën e një makine të Ambasadës Hungareze kaloi në Malin e Zi.
Ai ishte në shoqëri të dy diplomatëve, Kulsar Antal dhe Varsalvai Shaba, ky i fundit rezulton të jetë shef i administratës në ambasadën e Hungarisë në Tiranë.
Mediat bëjnë gjithashtu te ditur se Gruevski në po të njëjtën ditë hyri në territorin e Serbisë në orën 22:16, nga vendkalimi kufitar Dobrakovo me një makinë tjetër, në të cilën ndodheshin tashmë dy persona të tjerë, Cezar Josef Zoltan dhe Feledaz Saba, të dy me pasaporta diplomatike hungareze.
