Kryeministri izraelit Benjamin Netanyahu do të takohet sot me anëtarët e kabinetit të luftës të Izraelit , përfshirë ministrin e Mbrojtjes Yoav Gallad dhe liderin e opozitës Benny Gantz, raporton BBC.
Izraeli është vënë në gatishmëri të lartë, nën kërcënimin e një sulmi të mundshëm iranian . Sipas asaj që raporton rrjeti amerikan CBS News, duke cituar zyrtarë amerikanë, Irani mund të sulmojë duke përdorur më shumë se 100 dronë, dhjetëra raketa lundrimi dhe ndoshta raketa balistike kundër objektivave ushtarake në Izrael.
“Unë nuk mund të flas për madhësinë, shkallën dhe shtrirjen e këtij sulmi të mundshëm,” tha zëdhënësi i Këshillit të Sigurisë Kombëtare të Shtëpisë së Bardhë, John Kirby, duke theksuar megjithatë se kërcënimi iranian vlerësohet si “i besueshëm” dhe “real” dhe se Uashingtoni është ” duke monitoruar nga afër situatën”.
Presidenti amerikan Joe Biden, nga ana e tij, e ka bërë të qartë se SHBA do të mbështesë Izraelin në rast të një sulmi iranian. Irani “kërcënon të nisë një sulm të madh kundër Izraelit,” tha presidenti amerikan gjatë një konference të përbashkët shtypi në Shtëpinë e Bardhë me kryeministrin japonez Fumio Kishida.
“Siç i kam thënë kryeministrit Netanyahu, angazhimi ynë për sigurinë e Izraelit përpara këtyre kërcënimet nga Irani dhe aleatët e tij, është jofleksibil”, shtoi ai.
Në një klimë të tillë tensionesh të shtuara dhe nën frikën e sulmeve të kërcënuara, vende si SHBA, Britania e Madhe, India, Australia, paralajmëruan qytetarët e tyre që të mos udhëtojnë në Izrael dhe Iran gjatë kësaj periudhe.
Teherani ka deklaruar se do të hakmerret për goditjen e marrë në konsullatën e tij në Damask të Sirisë më 1 prill. Sulmi u mori jetën e 16 personave , duke përfshirë shtatë anëtarë të Gardës Revolucionare, një organ elitar i forcave të armatosura të Republikës Islamike, sipas OJQ-ve.
Sipas BBC, mundësia e një sulmi iranian ka shkaktuar shqetësim në Izrael. Megjithatë, qeveria nuk ka dhënë asnjë këshillë për qytetarët përtej udhëzimeve ekzistuese për të mbledhur ujë, ushqim për tre ditë dhe ilaçe bazë.
Radio izraelite raportoi se autoriteteve lokale iu tha të përgatiteshin për mundësinë e një sulmi, duke përfshirë vlerësimin e gatishmërisë së strehimoreve publike./vizionplus.tv/
