Gjatë vizitës zyrtare në Hungari, Ministri për Evropën dhe Punët e Jashtme, Igli Hasani, nënvizoi se sot rajoni e gjen veten në një moment veçanërisht të paparashikueshëm dhe integrimi në BE është garancia e vetme për një Ballkan Perëndimor paqësor, të sigurt dhe të begatë.
Në fjalën e tij në Akademinë Diplomatike të Budapestit, kryediplomati shqiptar theksoi gjithashtu rëndësinë e miratimit të një qasjeje të qëndrueshme strategjike të BE ndaj rajonit.
“Roli i Shqipërisë në promovimin e bashkëpunimit rajonal përmes Procesit të Berlinit, angazhimi i saj me “armiq historikë”, edhe në rrezik të kostove politike brenda vendit dhe ndërmjet shqiptarëve në rajon, është i njohur gjerësisht dhe dëshmon angazhimin tonë në idenë e nxitjes së bashkëpunimit dhe marrëdhënieve të fqinjësisë së mire. Ne besojmë se integrimi rajonal është një faktor kyç për të ardhmen tonë. Është i qenësishëm për paqen, stabilitetin dhe prosperitetin e rajonit”, tha Hasani.
Ministri Hasani gjithashtu deklaroi se dialogu mes Prishtinës dhe Beogradit duhet të ecë përpara dhe gjendja e Bosnje Hercegovinës duhet të trajtohet urgjentisht. Zgjidhja e këtyre dy situatave, sipas tij, do të heqë padyshim dy pengesa të rëndësishme në rrugën e integrimit dhe bashkëpunimit rajonal. /vizionplus.tv
