Ministria ruse e mbrojtjes ka kërcënuar Kievin me sulme në qendrat vendimmarrëse nëse provokimet në territorin rus, vazhdojnë.
Reagimi vjen vetëm pak orë pasi anija kryesore e flotës ruse të Detit të Zi, kryqëzori Moskva, u dëmtua rëndë nga shpërthimi i municioneve në bord. Një zyrtar ukrainas deklaroi se anija me kapacitet 12,500 tonë dhe me një ekuipazh prej rreth 500 personash, ishte goditur nga dy raketa.
Ndërkohë, Shtetet e Bashkuara autorizuan 800 milionë dollarë ndihmë shtesë për sigurinë e Ukrainës. Shtëpia e Bardhë bëri të ditur se kjo paketë e re ndihme do të përmbajë shumë nga sistemet e armëve që janë ofruar tashmë dhe aftësi të reja të përshtatura për sulmin më të gjerë që Rusia pritet të ndërmarrë në Ukrainën lindore.
Zëdhënësi i Pentagonit, John Kirby deklaroi se armët do të dërgohen ndërkohë që Rusia po riorganizon forcat, përfshirë helikopterët dhe sistemet e artilerisë, në Bjellorusi.
JOHN KIRBY ZEDHENES, PENTAGON
“Nuk janë plotësisht të gatshëm për rifillimin e ofensivës sepse duan të vendosen në Donbas. Ne e kuptojmë këtë dhe po përpiqemi të përfitojmë çdo ditë, çdo orë për t’i dërguar këto paisje atje sa më shpejt që të mundemi. Kemi një ide të qartë të përpjekjeve ruse për tu rifurnizuar dhe përforcuar”.
Ndërkohë katër vendet fqinje me Ukrainën gjithashtu kanë premtuar ndihmë humanitare dhe ushtarake. (efekte)
Presidentët e Polonisë, Lituanisë, Letonisë dhe Estonisë, të gjitha vende të NATO-s, u takuan me presidentin Zelenski në Kiev. Pasi vizituan qytetet e shkatërruara nga pushtimi rus, ata bënë thirrje për dënimin e mizorive dhe krimeve të luftës.
Në këtë udhëtim ishte planifikuar të bashkohej edhe presidenti gjerman, Frank Valter Steinmeier por vizita u anulua pas sinjaleve nga Kievi se kreu i shtetit federal nuk është i mirëpritur. Steinmeier mbështeste gazsjellësit Nord Stream dhe në vitin 2008 si ministër i Jashtëm i kabinetit Merkel ishte pjesëtar i vetos gjermane ndaj anëtarësimit të Ukrainës në NATO.
