Këto vargje të shkruara nga Ismail Kadare u jetësuan në sallën e Teatrit Kombëtarë të Operës dhe Baletit, në një mbrëmje poetike kushtuar gjeniut të letërsisë shqipe. Një homazh i ndërtuar me finesë artistike, ku në qendër ishte vetëm fjala .
Për Helena Kadarenë ky organizim u përjetua si një rikthim në universin krijues të Kadaresë.
Mbrëmja poetike që mbante titullin e një prej krijimeve më të ndjera të Kadaresë, “Pa ty” u organizua nga regjisorja Driada Dervishi. Poezitë u interpretuan nga Ndriçim Xhepa, Luiza Xhuvani, Zamira Kita dhe Arben Derhemi, të cilët sollën në skenë ndjeshmërinë dhe peshën e vargut të Ismail Kadares, mes një skenografie minimaliste dhe një ndriçimi intim që e përforconte atmosferën reflektuese.
Mbrëmja poetike “Pa ty” u kthye kështu në një akt kujtese dhe dialogu të heshtur mes aktorëve e publikut, si dhe një dëshmi se pena e Ismail Kadaresë vijon të jetojë përtej kohës./vizionplus.tv
