Ministri i Jashtëm Rus Sergey Lavrov ka deklaruar se sulmet e SHBA-së ndaj Iranit i japin fund mundësisë për një marrëveshje të përkohshme paqësore.
Ai ka kritikuar rifillimin e sulmeve ushtarake nga Shtetet e Bashkuara ndaj Iranit, duke deklaruar se ato “nuk çojnë në zgjidhje” dhe “mbyllin derën” për negociata paqësore dhe një marrëveshje të përkohshme.
Sipas agjencive iraniane si Fars dhe IRIB, Lavrov theksoi se sulmet po dëmtojnë infrastrukturën civile si në Iran ashtu edhe në vendet e Këshillit të Bashkëpunimit të Gjirit (GCC).
“Është e trishtueshme sepse infrastruktura civile po dëmtohet në Iran dhe në shtetet e Këshillit të Bashkëpunimit të Gjirit. Kjo nuk po çon në asgjë të mirë,” raportoi Fars.
Deklarata e Lavrovit vjen në mes të përshkallëzimit të ri të tensioneve midis SHBA-së dhe Iranit në korrik 2026.
Pas një periudhe relativisht të qetë dhe përpjekjesh për një marrëveshje të përkohshme në qershor, e ndërmjetësuar pjesërisht nga Katar dhe Pakistani, palët kanë rifilluar sulmet e ndërsjella, kryesisht të lidhura me kontrollin e Ngushticës së Hormuzit – rrugë jetike për transportin e naftës.
SHBA-ja ka kryer valë të reja sulmesh ajrore kundër objektivave ushtarake iraniane, me qëllim “degradimin” e aftësive të Iranit për të sulmuar anijet civile. Irani ka reaguar me sulme ndaj bazave ose interesave në shtetet fqinje të Gjirit.
Lavrov kritikoi gjithashtu dështimin e Shteteve të Bashkuara për të respektuar marrëveshjet e mëparshme ndërkombëtare, duke vënë në dyshim kredibilitetin e Uashingtonit kur bën premtime. Ai theksoi se veprime të tilla vetëm sa e komplikojnë situatën dhe pengojnë rrugën diplomatike.
