Si çdo drejtues i ri i administratës fiskale daljen e parë e publike shefja e sapo emëruar e tatimeve e beri për luftën kundër informalitetit: beteje e cila mbetet sfiduese dhe deri më sot, pa fitues.
Lufta kundër informalitetit nuk është një plan i përkohshëm masash, por vullnet i fortë i Qeverisë Shqiptare për të garantuar rregulla të barabarta në treg; për të mbështetur biznesin që i respekton rregullat dhe punon çdo ditë për të siguruar fitime në mënyrë të ndershme.
Gjatë konferencës për shtyp, drejtoresha e tatimeve bëri një bilanc të kontrolleve që nisen në terren nga data 1 deri në 21 korrik. Në total u kontrolluan 1000 subjekte. Ndërsa shkeljet ishin të natyrave të ndryshme, por dominuan ata që nuk lëshonin kupon tatimor.
62 subjekte janë konstatuar të paregjistruara në organet tatimore, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore. 53 tatimpagues janë penalizuar pasi janë konstatuar me punonjës të padeklaruar. 106 tatimpagues të penalizuar për moslëshimin e kuponit tatimor (rasti i parë), ndërsa 12 tatimpaguesve u janë bllokuar ambientet për 30 ditë kalendarike për moslëshim kuponi tatimor (hera e dytë). 12 tatimpagues janë konstatuar pa pajisje fiskale dhe 12 të tjerë nuk i mbanin pajisjet fiskale në gjendje pune.
Ibrahimaj paralajmëroi se deri në fund të vitit 6200 biznese do të jenë në fokus të kontrolleve: të gjithë u përzgjodhën mbi bazë risku.
