Përplasja e Shteteve të Bashkuara dhe Izraelit me Iranin ka hyrë në ditën e tretë, duke shënuar një përshkallëzim dramatik të tensioneve në rajon.
Izraeli ashpërsoi sulmet, përfshirë edhe ato ndaj militantëve të Hezbollahut, duke shkaktuar mbi 30 viktima dhe mbi 140 të plagosur.
Tre avionë luftarakë amerikanë u qëlluan aksidentalisht nga mbrojtja ajrore e Kuvajtit. Qeveria e ka pranuar incidentin dhe ka ofruar mbështetje për vazhdimësinë e operacionit.
Garda Revolucionare e Iranit pretendon se sulmet e saj të fundit me raketa kanë pasur si objektiv zyrën e kryeministrit izraelit, Benjamin Netanyahu, si dhe selinë e komandantit të Forcave Ajrore të Izraelit.
Autoritetet amerikane konfirmuan se tre ushtarë amerikanë kanë humbur jetën dhe pesë të tjerë janë plagosur rëndë gjatë sulmeve të fundit, duke shënuar humbjet e para të konfirmuara nga ana e SHBA-së që prej nisjes së operacionit.
Presidenti Donald Trump u zotua të dielën se do të “hakmerret” për vdekjen e tre ushtarakëve amerikanë.
“Si një komb i vetëm, ne vajtojmë për patriotët e vërtetë amerikanë që kanë bërë sakrificën përfundimtare për kombin tonë. Edhe pse vazhdojmë misionin e drejtë për të cilin ata dhanë jetën e tyre, ne lutemi për shërimin e plotë të të plagosurve. Amerika do të hakmerret për vdekjet e tyre dhe do t’u japë goditjen më ndëshkuese terroristëve.”
Presidenti Trump u shpreh se e eliminoi Ajatollah Khamenein sepse lideri suprem e kishte kërcënuar më pare.
“E kapa atë para se ai të më kapë mua. Ata u përpoqën dy herë. Epo, unë e kapa i pari.”
Nga ana tjetër, mediat shtetërore iraniane raportojnë mbi 500 viktima, nga të cilët 165 u vranë në një shkollë fillore për vajza.
Udhëheqësit amerikanë kanë deklaruar se operacionet do të vazhdojnë derisa të arrihen objektivat strategjikë, ndërkohë Gjermania, Franca dhe Britania do të bashkëpunojnë me SHBA-në.
Vrasja e udhëheqësit suprem të Iranit, Ajatollah Khameneit, ka shtuar spekulimet për tradhti nga brenda qeverisjes së regjimit të Teheranit. Mediat kanë ngritur dyshime se njëri nga gjeneralët e lartë, i rekrutuar nga shërbimi sekret izraelit, mund të ketë treguar vendodhjen e saktë të Khameneit.
