Teksa Komisioneri Shtetëror i Zgjedhjeve, Ilirjan Celibashi vendosi për fletën e votimit me emrat e kandidatëve, Ermonela Felaj deklaroi se me rëndësi është që ajo të jetë e kuptueshme nga votuesit.
“Fleta e votimit është një instrument jo i parëndësishëm, duhen ndjekur disa parime, rregulla. Fleta e votimit duhet të mos krijojë konfuzion te votuesit dhe të jetë e kuptueshme për nivelin mesatar të votuesit.”
Gjatë një interviste për edicionin qendror të lajmeve në “Vizion Plus”, kandidatja për deputete e PS ju kundërpërgjigj edhe kundërshtarit politik Oerd Bylykbashi. Një ditë më parë, po nga studioja e “Vizion Plus”, Bylykbashi tha se PS kërkon fletën e votimit me numra për të fshehur emrat e kandidatëve të lidhur me krimin. Por Felaj akuzoi se diçka e tillë është e vërtetë për partitë opozitare dhe jo PS.
“Ne listat i kemi bërë publike që në momentin e parë, në ndryshim nga PD që nuk i bëri publik emrat. Nuk kemi patur të përfshirë emra të lidhur me krimin, problem që e kanë patur partitë e tjera opozitare, kanë emra me rekorde kriminale.”
Duke kërkuar një proces zgjedhor të qetë, thirrja e Ermonela Felajt është që qyetarët të votojnë për Partinë Socialiste.
