Ferri që përjetuan nga zjarri i rënë në ndërtesën 24-katëshe në Londër nuk ka marrë fund për banorët, të cilët presin lajme për fatin e të afërmve. Deri tani shifra e viktimave ka arritur në 17, por bilanci mund të shkojë në 100 të vdekur. Kërkimi i trupave është shumë i vështirë për shkak të frikës se godina mund të shembet dhe në katet e sipërme po kërkohet me qenë. Operacionet mund të zgjasin disa javë. Zjarrfikësit nuk shpresojnë për gjetjen e të mbijetuarve në kullën Grenfell. Shumë prej dëshmitarëve nuk gjenin fjalë për të përshkruar tmerrin e përjetuar.
“Pame shumë gjera me sy, pamë miq, pame familje….Njerëzit thërrisnin nga dritaret. Një grua bente me shenjë se do të hidhte foshnjën me shpresën, qe dikush ta kapte. Një burrë arriti ta priste dhe ta shpëtonte”.
Kryeministrja Theresa May premtoi hetim të plotë për të zbuluar shkaqet e rënies së zjarrit, që mbeten ende të panjohura. Ekspertë të zjarreve e përshkruajnë ngjarjen si fatkeqësi që pritej të ndodhte për shkak të mosrespektimit të rregulloreve të sigurisë. Ndërtesa kishte pësuar riparime vitin e kaluar dhe banorët kanë hedhur dyshime për cilësinë e punimeve për izolimin e saj, ku është përdorur material plastik, që ka çuar në përhapjen me shpejtësi të flakëve brenda 15 minutave. Sistemi kundër zjarrit nuk ka funksionuar, alarmi nuk ka rënë dhe e vetmja shkallë nga mund të dilnin njerëzit ka qenë e bllokuar.
