Një fëmijë i vogël që refuzoi të ulej në vendin e tij dhe të lidhte rripin e sigurimit shkaktoi anulimin e një fluturimi të Porter Airlines në Kanada, duke lënë pasagjerët të përballeshin me orë të tëra pritjeje dhe detyrimin për të kaluar natën në British Columbia.
Avioni ishte nisur nga terminali i Aeroportit Ndërkombëtar të Victoria-s dhe po drejtohej drejt pistës së ngritjes, kur ekuipazhi dhe prindi i fëmijës tentuan disa herë ta bindnin atë të qëndronte ulur dhe të lidhte rripin e sigurimit. Sipas kompanisë ajrore, fëmija qëndronte në këmbë mbi sedilje, duke krijuar kushte që nuk lejonin një ngritje të sigurt.
Për këtë arsye, avioni u kthye në portë, ku prindi dhe fëmija zbritën së bashku me bagazhet. Edhe pasagjerët e tjerë u detyruan të largoheshin nga avioni, pasi duhej të dorëzohej përsëri plani i fluturimit dhe të përfundonin procedurat e nevojshme të sigurisë.
Porter Airlines flight cancelled after a child refused to sit down and buckle up. The plane returned to the terminal to remove the parent and child. All other passengers were forced to disembark. (CTV News) pic.twitter.com/zc7cvWf4HR
— World Vibe (@world_vibe_en) August 10, 2026
Vonesa bëri që fluturimi drejt Torontos të mos arrinte të nisej përpara mbylljes së planifikuar të pistës në orën 00:30. Si pasojë, fluturimi u anulua dhe pasagjerët u detyruan të kalonin natën në British Columbia, përpara se të transferoheshin në një fluturim tjetër ditën e ardhshme. Kompania ajrore u kërkoi falje pasagjerëve për shqetësimin e shkaktuar.
Disa pasagjerë i thanë rrjetit kanadez CBC se fëmija nuk dukej se po sillej keq, por ishte i frikësuar. Një prej tyre tregoi se ai fshihej vazhdimisht poshtë sediljes dhe, sa herë përpiqeshin ta ulnin e t’i lidhnin rripin, largohej sërish.
Pasagjerët kritikuan gjithashtu mënyrën se si u menaxhua situata dhe mungesën e informacionit pas anulimit. Disa prej tyre u detyruan të kërkonin në minutat e fundit dhoma të lira në hotele pranë aeroportit dhe tani kërkojnë që kompania ajrore t’u rimbursojë shpenzimet e krijuara nga anulimi.
/vizionplus.tv
