Një juri në Gjykatën e Lartë në Auckland, Zelandë e Re, shpalli të martën fajtore Hakyung Lee për vrasjen e dy fëmijëve të saj të mitur në vitin 2018, trupat e të cilëve u gjetën katër vite më vonë në valixhe të braktisura në një njësí magazinimi.
Lee, 45 vjeç, një shtetase e Zelandës së Re me origjinë koreano-jugore, u akuzua për vrasjen e djalit të saj Minu Jo, 6 vjeç, dhe vajzës Yuna Jo, 8 vjeç, në qershor të vitit 2018. Pas krimit, ajo u largua për në Korenë e Jugut, ku edhe ndryshoi emrin e saj. Ajo u ekstradua në Zelandën e Re në nëntor 2022 për t’u përballur me drejtësinë.
Avokatët e saj pretenduan se Lee ishte në gjendje të rënduar mendore dhe kishte vepruar nën ndikimin e sëmundjes mendore pas vdekjes së bashkëshortit të saj. Avokatja Lorraine Smith tha se ajo kishte administruar fëmijëve medikamente antidepresive që shkaktuan vdekjen e tyre, por se veprimet e saj erdhën si pasojë e “çmendurisë”.
Megjithatë, prokuroria argumentoi se edhe pse Lee vuante nga depresioni, ai nuk ishte aq i rëndë sa të justifikonte një mbrojtje për papërgjegjshmëri mendore. Prokurorja Natalie Walker tha se veprimet e saj ishin të planifikuara dhe të motivuara nga egoizmi, pasi donte të fillonte një jetë të re pa fëmijët.
Babai i tyre kishte vdekur nga kanceri në fund të vitit 2017.
Trupat e pajetë u zbuluan vetëm në vitin 2022, kur Lee kishte ndaluar së paguari tarifat e magazinës dhe përmbajtja e njësisë u shit në një ankand online. Blerësit gjetën trupat brenda valixheve dhe njoftuan policinë.
Pas shpalljes së fajësisë, gjykatësi Geoffrey Venning urdhëroi që Lee të qëndrojë në paraburgim deri në seancën e dënimit që do të mbahet më 26 nëntor. Në Zelandën e Re, dënimi për vrasje është burgim i përjetshëm, me një minimum prej 10 vitesh para se të mund të kërkohet lirimi me kusht.
/vizionplus.tv
