Çfarë ndodhi në burg? Reperi Diddy përfundon në spital me dëmtime në kokë
Reperi dhe biznesmeni amerikan Sean “Diddy” Combs është transportuar në spital pasi ka pësuar një dëmtim në kokë, ndërsa ndodhet në një burg federal në New Jersey të Shteteve të Bashkuara.
Sipas raportimeve të TMZ, 56-vjeçari u dërgua në spital në orët e para të mëngjesit të së shtunës, më 10 tetor, për shkak të një dëmtimi që nuk përbënte rrezik për jetën. Ai ishte i vetëdijshëm dhe në gjendje të fliste përpara transportimit, ndërsa u kthye në burg po atë ditë. Deri më tani, nuk dihen rrethanat se si është dëmtuar.
Një përfaqësues i tij deklaroi për revistën “Variety” se ekipi i reperit është në dijeni të raportimeve dhe po përpiqet të konfirmojë rrethanat e ngjarjes. Ai shtoi se shëndeti dhe mirëqenia e Sean Combs janë përparësia e menjëhershme e ekipit të tij.
Kohët e fundit, Diddy ka qenë në qendër të vëmendjes edhe për kushtet e qëndrimit në burgun Fort Dix. Sipas një raportimi të NBC News në fund të shtatorit, reperi dyshohet se kishte pasur akses në telefona celularë të paligjshëm, përmes të cilëve mund të përdorte Instagramin dhe të shihte fotografi me përmbajtje nudo dhe seksuale, që pretendohet se ia dërgonte një ish-partnere.
I njëjti raportim pretendonte se gjatë fundjavave ai kishte akses edhe në alkool, i cili dyshohet se futej kontrabandë në burg nga punonjës të institucionit. Pas publikimit të këtyre pretendimeve, Combs raportohet se u ndëshkua dhe humbi 41 ditë nga koha e sjelljes së mirë, që mund t’i shërbente për uljen e dënimit. Sipas mediave amerikane, kjo masë e zhvendosi datën e mundshme të lirimit nga janari në mars 2028.
Reperi po vuan një dënim prej katër vitesh e dy muajsh burg, pasi në tetor 2025 u shpall fajtor për dy akuza që lidhen me transportimin e personave me qëllim përfshirjen në prostitucion. Ndërkohë, çështjet e tij gjyqësore vijojnë edhe gjatë kohës së qëndrimit në burg.
Së fundmi, një gjykatë e detyroi gjithashtu Combs të paguajë 477.700 dollarë për shpenzimet ligjore të kompanisë NBCUniversal, pasi humbi një padi për shpifje prej 100 milionë dollarësh, të ngritur lidhur me dokumentarin “Diddy: The Making of a Bad Boy”.
