Aeroporti më i ngarkuar në botë, Hartsfield-Jackson International në Atlanta të SHBA, u përfshi nga kaosi, për shkak të një zjarri që shpërtheu në një kabinë elektrike të nëndheshme.
Udhëtarët u detyruan të evakuoheshin në një pjesë tjetër të aeroportit për shkak të tymit që u përhap. Ata u përpoqën të përdornin dritat e celularëve për të shmangur incidentet, ndërsa qindra policë u aktivizuan për të garantuar sigurinë e udhëtarëve të bllokuar.
Vetëm mëngjesin e kësaj të hëne sipas orës lokale, u njoftua anulimi i 300 fluturimeve, duke shkaktuar pakënaqësi tek qindra udhëtarë.
Kryetari i Bashkisë së Atlantës, Kasim Reed, gjatë një konference për shtyp, në prani të drejtuesve të aeroportit, kërkoi falje për vonesën.
“E para dhe më e rëndësishmja, unë jam këtu për të shprehur faljet e mia të sinqerta për mijëra pasagjerë, dita e të cilëve u ndërpre në këtë mënyrë. Ne e kuptojmë që ndërprerja ka shkaktuar frustrim dhe zemërim, por po bëjmë gjithçka që mundemi që njerëzit të shkojnë në destinacinet e tyre”.
Aeroporti Hartsfield-Jackson International në Atlanta zhvillon mesatarisht 2.500 fluturime, me rreth 275 mijë pasagjerë në një ditë, ndërsa defekti në sistemin elektrik solli dështimin e më shumë se 1000 fluturimeve. Mendohet se defekti mund të ketë një efekt të madh në të gjithë trafikun ajror, si brenda dhe jashtë SHBA për shkak të vonesave të linjave.