Kryetari i Partisë Demokratike, Sali Berisha, në Asamblenë Parlamentare të Këshillit të Evropës ngriti shqetësimin se kryeministri Edi Rama po pengon drejtësinë duke bllokuar kërkesën e SPAK-ut për arrestimin e zëvendëskryeministres Belinda Balluku. Në fjalën e tij në Asamble, Berisha deklaroi se kryeministri Edi Rama nuk po i jep SPAK-ut autorizimin për arrestimin e zëvendëskryeministres Belinda Balluku, për të mbrojtur veten e tij, pasi janë pjesë e të njëjtës dosje hetimore.
“Prokuroria kërkoi arrestimin dhe heqjen e imunitetit të zëvendëskryeministres. Edi Rama, kryeministri, i quajtur Ramaduro i Madh, e bllokoi iniciativën e Prokurorisë dhe nuk po e lejon. Pse? Sepse në çdo tre rreshta të kësaj dosjeje gjendet emri i tij. E njëjta gjë po ndodh me AKSHI-n, Agjencinë Kombëtare të Teknologjisë. Të gjitha të dhënat po eksportohen te bandat kriminale dhe banditët”, tha Berisha.
Berisha akuzoi kryeministrin se ka sjellë në Parlament persona të mbështetur nga bandat kriminale dhe votat e tyre po i përdor sot për të bllokuar SPAK-un.
“28 deputetë kanë hyrë në Parlament të mbështetur nga kartelet më të fuqishme të drogës. Pas kësaj, atyre iu dhanë 450 leje për hotele, motele, ndërtime dhe resorte turistike. Më pas, mandatet e tyre u përdorën për të bllokuar tërësisht Prokurorinë”, shtoi Berisha.
Në Strasburg, kryetari i PD-së shfrytëzoi diskutimin për ndërhyrje ruse në zgjedhjet e vendeve të tjera për të ngritur shqetësimin për zgjedhjet e 11 majit në Shqipëri, të cilat sipas tij nuk ishin as të lira e as të drejta.
“Unë dënoj fuqishëm ndërhyrjen ruse në zgjedhjet e vendeve të tjera, por jam këtu gjithashtu për të denoncuar dy faktorë të tjerë madhorë që mund t’i shkatërrojnë zgjedhjet. Njëri prej tyre është shteti-parti ose partia-shtet, ashtu siç u tha këtu nga vëzhguesit, se në Shqipëri zgjedhjet u zhvilluan në klimën e një partie-shtet”, deklaroi Berisha.
Në raportin që Asambleja Parlamentare e Këshillit të Evropës miratoi për zgjedhjet e 11 majit të vitit të kaluar, vihet në dukje se partia në pushtet përfitoi nga përdorimi i gjerë i burimeve shtetërore, dhe një prej rekomandimeve të saj ishte që duhen ndërhyrje për të ndarë qartësisht partinë në pushtet nga shteti./vizionplus.tv
