Kryetari i PD Sali Berisha akuzoi kryeministrin Edi Rama se po përdor parlamentin dhe Gjykatën Kushtetuese për të bllokuar hetimet e SPAK-ut ndaj zëvendëskryeministres Belinda Balluku. Gjatë një konference me gazetarët Berisha deklaroi se shtyrja pa afat e mbledhjes së Këshillit të Mandateve dhe Imunitetin, ku prej 16 dhjetorit ndodhet kërkesa e SPAK-ut për adresimin e Belinda Ballukut, behet me urdhër të kryeministrit duke paralajmëruar se mazhoranca do të votojë kundër kërkesës së Prokurorisë së Posaçme.
“Edi Rama nuk pranon t’i heqë imunitetin Lubi Ballukut sepse e di që në tre rreshta, dy janë për Ramën në atë dosje. Edi Rama edhe njëherë, po të përdorja ca terma të lashtë, do të ishte i gatshëm ti shkrinte dhe plumb në vesh Lubi Ballukut, dhe ta hiqte qafe, po të mos ishte se dosja e saj në çdo 3 rreshta, 2 janë për Ramën”, tha Berisha.
Berisha akuzoi edhe Gjykatën Kushtetuese e cila ende nuk ka marrë një vendim për pezullimin e Belinda Ballukut nga funksionet që mban në qeveri se ndodhet nën urdhrat e kryeministrit Rama.
“Ajo mori përsipër një çështje, të cilën absolutisht nuk mund ta shqyrtonte pa kaluar në Apel dhe Gjykatën e Lartë. Dhe ajo po me urdhër të Edi Ramës, ka caktuar deri më tani 3 data dhe nuk e shqyrton dot, sepse Edi Rama e tërheq zvarrë për turpin e saj”, shtoi Berisha.
Në këtë situatë Berisha kërkoi edhe njëherë largimin e kryeministrit Edi Rama, duke paralajmëruar zhvillimin së shpejti të një proteste të re kundër qeverisë.
“Do të provojë Edi Rama guximin e qytetarëve. Do të provojë Edi Rama se si guxon tu thotë qytetarëve që ju kam vjedhur dhe do tu vjedh. Ai duhet të japë dorëheqjen, të largohet menjëherë nga qeveria. Të japë dorëheqjen dhe të krijojë qeveri teknike për të bërë zgjedhje dhe të mos bllokohet drejtësia”, tha Berisha.
Gjatë këtyre ditëve pritet që kryetari i PD Sali Berisha të mbledhë kryesine për të caktuar datën e protestës kundër kryeministrit Edi Rama./vizionplus.tv
