Kryetari i Partisë Demokratike, Sali Berisha, ka përshëndetur miratimin e raportit të piketave të ndërmjetme, IBAR, në Bruksel. Në një konferencë me gazetarët, Berisha deklaroi se ky dokument është vlerësimi më i saktë për sfidat që ka Shqipëria.
“Ky raport është një fitore për çdo shqiptar që konsideron të ardhmen e tij më të mirë në Bashkimin Europian, por beson se shqiptarët në këtë proces bëhen më të lirë, më të mëkëmbur, më të sigurt, me kusht që ky të jetë një proces i bazuar në meritë.”
Sipas Berishës, përgjatë negociatave të muajve të fundit mes Komisionit Europian dhe vendeve anëtare të BE-së janë shtuar kushtet për Shqipërinë. Për të mbështetur këtë ide, Berisha krahasoi draftin e parë të hartuar nga Komisioni në shkurtin e këtij viti, kur IBAR nisi shqyrtimin në grupin e punës për zgjerimin, të njohur me emrin COELA, me dokumentin që vendet anëtare miratuan në fund.
Berisha ka veçuar nga ky raport çështjen e korrupsionit, pasi sipas tij vendet anëtare kanë ashpërsuar gjuhën.
“Tani është kaluar në një terminologji krejtësisht tjetër: korrupsioni, shqetësim vendimtar, themelor. Me një fjalë, Shqipëria pothuajse me karton të kuq. Krucial. Nuk e kisha hasur kurrë. Kam hasur terma ‘galopant’, ‘përvaziv’, por ‘krucial’ jo. Ky është vlerësimi dhe cilësimi që i ka bërë COELA pas zbulimit se Edi Rama qëndron prapa dosjeve të Lubi Ballukut dhe Lindave të tij. ‘Krucial’ sinjalizon status afër vijës së kuqe në gjuhën diplomatike.”
Berisha veçoi edhe shqetësimin e vendeve anëtare të BE-së për presionet dhe gjuhën e ekzekutivit dhe legjislativit ndaj SPAK-ut dhe gjykatave. Edhe pse vetë është një prej politikanëve që ka përdorur kritikat më të ashpra ndaj SPAK-ut, Berisha deklaroi se kritikat e Brukselit janë për kryeministrin Edi Rama.
“Pas sulmeve dhe bllokimit të SPAK-ut nga Edi Rama, BE del hapur në mbrojtje të rezultateve, domethënë të padive të paraqitura ndaj Lubi Ballukut dhe zyrtarëve të tjerë të AKSHI-t dhe të rrugëve. Është shtuar: ‘BE mirëpret rezultatet e mira të arritura gjer tani nga SPAK-u dhe gjykatat e tij, përfshi rastet e korrupsionit në nivelet e larta.’”
Kryetari i PD-së nënvizoi si shumë të rëndësishëm për Shqipërinë edhe kushtëzimin e rrugës së integrimit me mbajtjen e zgjedhjeve në përputhje me standardet e OSBE-ODIHR-it.
/vizionplus.tv
