Kreu i Partisë Demokratike, Lulzim Basha, duke përsëritur qëndrimin e tij se 25 prilli ishte një masakër, ai deklaroi se janë depozituar 185 padi penale në SPAK dhe në prokuroritë e rretheve për krimet zgjedhore.
Në një postim në “Facebook”, kryedemokrati theksoi se Shqipëria do të vijojë të sundohet nga një pakicë e korruptuar nëse autorët e “masakrës” nuk ndëshkohen.
“25 prilli ishte një masakër zgjedhore! Këtë e dinë të gjithë shqiptarët, këtë e konfirmon edhe OSBE/ODIHR. Partia Demokratike ka depozituar 185 padi penale në SPAK dhe në prokuroritë e rretheve për krimet zgjedhore. Ne presim drejtësi, sepse shqiptarët meritojnë zgjedhje të lira dhe të ndershme. Pa u ndëshkuar autorët e kësaj masakre, pa u kthyer legjitimiteti në vend, nuk do të kemi një pushtet të njerëzve për njerëzit, por sundimin e një pakice të korruptuar që varfëron dhe shpopullon Shqipërinë.”
