Avokati Leonard Karaj ka bërë një tjetër deklaratë të fortë këtë të martë në studion e Quo Vadis të moderatores Pranvera Borakaj në Vizion Plus, ndërsa fliste për “çështjen” Bankers Petroleum.
Ai tha se nuk ka vjedhje më të madhe në historinë e Shqipërisë se sa kjo e Bankers Petroleum.
Sipas tij, në këtë çështje janë të përfshirë e gjithë politika 30-vjeçare shqiptare.
Pjesë nga biseda:
Karaj: Nuk ka vjedhje më të madhe në historinë e këtij vendi më shumë se sa Bankers Petroleum. Deri në 2014-ën ka pasur 10 miliardë euro xhiro, ndërsa shteti shqiptar e kishte buxhetin 5 miliardë euro. Këta e prodhonin naftën, por diku do e nxirrnin, aty do e shkruanin sa vaporë do iknin. Për qejfin tim pyeta një inxhinier dhe më tregoi: Ne të prodhimit nuk luanim me shifrat, problemi qëndron se kur mua më vinte letra hiqja 2 mijë ton dhe më dilnin 800. Këtu është bërë një vjedhje katastrofale. Më e keqja është se SPAK u drojt, nuk donte ta merrte fare.
Borakaj: Pse e mori tani?
Karaj: Pa se nuk ishte çështje e disa personave, por edhe çështje politikanësh.
Borakaj: Mendon se SPAK do t’i shkojë deri në fund?
Karaj: Uroj. Për ta menduar nuk e mendoj, pasi këtu përfshihet e gjithë politika e këtyre 30 viteve. Nuk ka të majtë e të djathtë që nuk kanë marrë nga Bankers Petroleum. Ka pasur vijimësi. Kur nisi kjo çështja Bankers, mua më shkoi mendja që këta duan të fusin dikë tjetër, dhe prisni se nga marsi–prilli do të vijë dikush tjetër. Ne kemi qejf t’i kemi amerikanë, kanadezë, ose gjermanë. Teorikisht, ashtu si praktikisht, nuk ka ardhur asnjë kompani serioze. Do të shihni se në mars do të vijë ndonjë kompani shqiptare.
Borakaj: Pse në mars?
Karaj: Po bëjnë kontratat gati.
