Arrestohet 42-vjeçari që transportonte një person për kalim të paligjshëm në Greqi, sekuestrohen 6800 euro
Policia e Beratit ka finalizuar operacionin e koduar “Kthesa”, duke arrestuar një 42-vjeçar, i cili dyshohet se po transportonte një shtetas shqiptar me qëllim kalimin e paligjshëm të kufirit drejt Greqisë. Në kuadër të operacionit, një tjetër 42-vjeçar, banues në Laç, është proceduar në gjendje të lirë.
Operacioni u zhvillua pas një hetimi njëmujor me metoda proaktive, nën drejtimin e Prokurorisë. Automjeti që drejtohej nga i arrestuari u ndalua pranë Pikës së Kalimit Kufitar Kakavijë, ku pasagjer ishte shtetasi D. Rr., i cili dyshohet se do të kalonte ilegalisht kufirin.
Gjatë veprimeve policore u sekuestruan 6800 euro, të dyshuara se ishin përfituar nga transporti i kundërligjshëm, si dhe tre telefona celularë dhe automjeti i përdorur për transportin e dy shtetasve.
Materialet procedurale janë referuar në Prokurori për veprime të mëtejshme, ndërsa hetimet vijojnë për dokumentimin e plotë të aktivitetit të dyshuar të paligjshëm.
/vizionplus.tv
