Pasi Ankaraja zyrtare nënshkroi memorandumin e sigurisë për detin me Tripolin, presidenti Recep Tayip Erdogan ka deklaruar se Turqia është e gatshme të dërgojë trupa në Libi për të mbrojtur të drejtat e të dyja vendeve në Mesdheun lindor.
Ky hap I radhës vjen në kohën kur lufta libiane hyn në një fazë vendimtare, pasi Khalifa Haftar nisi atë që ai e quajti “beteja e fundit” për Tripolin.
Sipas analistëve, Ankaraja ka kërkuar të zhvillojë një politikë ndikimi pas rënies së ish-sunduesit të Libisë, Moammar Gaddafi.
Por me ofensivën e komandantit Khalifa Haftar kundër Tripolit në muajin prill, turqit gjetën mënyra të reja për të zgjeruar ndikimin e tyre politik dhe ushtarak.
Sipas ekspertëve, interesi strategjik i Turqisë është të zhvillojë një politikë mesdhetare e cila mund të konkurrojë me atë të europianëve.
Nga ana tjetër, llogaritjet ekonomike janë një faktor kyc pasi Libia ofron perspektiva të mëdha sa i përket zhvillimit të infrastrukturës dhe rindërtimit. Për më tepër, Turqia mund të synojë të shfaqë aftësitë e saj ushtarake duke i shitur armë të ashtuquajturës Qeveria e Akordit Kombëtar me qendër në Tripoli.
Javën e kaluar, Këshilli i Sigurimit i OKB zbuloi se Turqia, së bashku me Jordaninë dhe Emiratet e Bashkuara Arabe, ishte midis qeverive që shkelnin embargon e armëve në Libi duke armatosur palët ndërluftuese.
Masa e fundit e Ankarasë rrezikon konfrontimin me forcat e udhëhequra nga Khalifa Haftar me qendër në Lindjen e Libisë, duke nxitur më shumë konflikte në një rajon të paqëndrueshëm.
Premtimi i Turqisë për të ofruar mbështetje ushtarake për Libinë vjen në një kohë tensionesh të mëdha midis Ankarasë dhe vendeve të BE pas ndërhyrjes ushtarake kundër kurdëve në Siri në fillim të këtij viti. Për më tepër, Ankaraja dhe Tripoli nënshkruan marrëveshjen e tyre të sigurisë dhe ushtrisë në të njëjtën kohë si një memorandum i veçantë për kufijtë detarë që zemëruan Greqinë.
Athina zyrtare, e cila dëboi ambasadorin libian për paktin e kufirit detar, ka paralajmëruar se Turqia po përshkallëzon tensionet në rajon.
“Turqia duhet të zgjedhë nëse do të ndjekë rrugën e izolimit të vetvetes, duke vazhduar të luajë rolin e krijuesit të problemeve në rajon, ose të sillet si një fqinj i mirë tani e tutje,” deklaroi zëvendësministri i jashtëm i Greqisë, Miltiadis Varvitsiotis, për gazetën Etnos.
Greqia ka dënuar gjithashtu eksplorimin e gazit turk në brigjet e ishullit të ndarë të Qipros. Ndërsa reagimi i BE mbi të gjitha këto cështje mbetet i kushtëzuar nga përgjigja turke për emigrantët.
Burimi: Al Jazeera
