Katër sulme nga peshkaqenë janë regjistruar brenda vetëm 48 orëve në Australi, duke shkaktuar shqetësim të madh te pushuesit dhe komunitetet bregdetare.
Rasti i katërt përfshin një surfer 39-vjeçar, i cili u transportua në spital pasi u kafshua nga një peshkaqen në ujërat pranë parkut kombëtar Limeburners Creek, në shtetin e Uellsit të Ri Jugor. Autoritetet shëndetësore lokale bënë të ditur se ai ndodhet në gjendje të qëndrueshme, me dëmtime të lehta.
Sipas policisë së Uellsit të Ri Jugor, burri ishte duke bërë surf kur një peshkaqen i kapi dërrasën. Ai pësoi një plagë në kraharor dhe mori ndihmën e parë në spitalin e zonës.
Drejtori ekzekutiv i Surf Life Saving NSW, Steven Pearce, deklaroi për ABC se surferi i shpëtoi një dëmtimi të rëndë dhe po shërohet me prerje dhe gërvishtje të vogla. Ai u bëri thirrje qytetarëve të shmangin detin:
“Nëse dikush po mendon të hyjë sot në ujë përgjatë plazheve veriore, më mirë ta rishqyrtojë. Thjesht shkoni në një pishinë.”
Pearce theksoi se cilësia e dobët e ujit, pas reshjeve të dendura, favorizon praninë e peshkaqenëve dem, duke e bërë notin shumë të rrezikshëm. Sipas tij, dy persona ndodhen në spital me plagë serioze, ndërsa plazhet aktualisht nuk konsiderohen të sigurta.
Nga ana tjetër, përfaqësuesja e komunikimit e Surf Life Saving NSW, Donna Whishart, bëri të ditur se janë aktivizuar dronë dhe ekipe shpëtimi në zonën pranë Crescent Head. Ajo konfirmoi se surferi kishte pësuar gërvishtje në këmbë pas kontaktit me peshkaqenin.
Ditët e fundit, zona e Sidneit ka shënuar disa sulme nga peshkaqenët, pas një periudhe me reshje intensive. Një djalë 12-vjeçar vazhdon të qëndrojë i shtruar në spital pasi u kafshua nga peshkaqeni pranë parkut Nielsen, të dielën.
Ekspertët paralajmërojnë se kushtet ujëra të përziera me ujë të ëmbël në portin e Sidneit dhe përgjatë bregdetit tërheqin peshkaqenët dhe rrisin rrezikun për notarët. Policia u ka bërë thirrje qytetarëve të shmangin hyrjen në det në këto kushte.
/vizionplus.tv
