Të paktën 39 persona kanë humbur jetën si pasojë e një aksidenti të rëndë hekurudhor në Spanjë dhe dhjetëra të tjerë kanë mbetur të lënduar.
Kryeministri i vendit Edi Rama i ka shprehur ngushëllimet homologut të tij spanjoll, Pedro Sanchez.
Rama: I dashur Pedro,
Me trishtim të thellë kam marrë lajmin për aksidentin tragjik hekurudhor të ndodhur në Adamuz.
Në emër të popullit të Shqipërisë dhe në emrin tim personal, dëshiroj të shpreh ngushëllimet e mia më të sinqerta për familjet e viktimave dhe solidaritetin tim me popullin dhe Qeverinë e Spanjës në këtë moment dhimbjeje.
Mendimet tona janë me ata që kanë humbur të dashurit e tyre dhe me të gjitha ekipet që po punojnë pa u lodhur në përballimin e kësaj tragjedie.
Dear Pedro @sanchezcastejon
He recibido con profunda tristeza la noticia del trágico accidente ferroviario ocurrido en Adamuz.
En nombre del pueblo de Albania y en el mío propio, quiero expresar mis más sentidas condolencias a las familias de las víctimas y mi solidaridad con…
— Edi Rama (@ediramaal) January 19, 2026
Aksidenti i rëndë ndodhi një ditë më parë në jug të spanjës. Një tren që po udhëtonte drejt Madridit doli nga shinat dhe kaloi në binarët e kundërt, ku u përplas me një tren tjetër që po vinte përballë, në Adamuz, pranë qytetit të Kordobës. Në të dy trenat ndodheshin rreth 400 pasagjerë dhe anëtarë të stafit.
Shërbimet e emergjencës të Andaluzisë njoftuan se të paktën 73 persona janë dërguar në spital, 24 prej tyre në gjendje të rëndë, përfshirë katër fëmijë.
Treni i përfshirë në aksident ishte i tipit Freccia 1000, i cili mund të arrijë shpejtësi deri në 400 km/orë. Ekipet e shpëtimit thanë se rrënojat e deformuara e bënë shumë të vështirë nxjerrjen e personave të bllokuar brenda vagonëve.
Kryeministri i Spanjës, Pedro Sánchez, deklaroi se vendi po përjeton “një natë dhimbjeje të thellë”. Mbreti Felipe VI dhe Mbretëresha Letizia shprehën ngushëllimet e tyre për familjarët e viktimave dhe uruan shërim të shpejtë për të plagosurit.
Të gjitha shërbimet hekurudhore mes Madridit dhe Andaluzisë u pezulluan pas aksidentit dhe pritet të mbeten të mbyllura gjatë gjithë ditës së hënë. Shkaku zyrtar i përplasjes ende nuk dihet dhe hetimi pritet të zgjasë të paktën një muaj.
