Eksperti i ekonomisë, Elvin Meka tregon arsyet e dobësimit të monedhës europiane përballë lekut. Në një intervistë për Vizion Plus, ai shprehet se qytetarët duhet të ndjekin disa udhëzime nëse kanë kursime në këtë monedhë.
Monedha europiane ka shënuar rënie rekord, ndërsa ekspertët paralajmërojnë se nuk do të mbetet me aq. Pse mendoni se euro pësoi këtë rënie?
“Faktorë që kanë të bëjnë me rritjen e dërgesave të emigrantëve, fluksin rekord të turizmit, duhet përmendur kanalizimi i parave informale, kjo pjesë nuk merr atë vëmëndjen e duhur, por duhet theksuar. Nga ana tjetër janë shtuar dy elementë të rinj, të cilët përgjithësisht përgjatë këtij 9 mujori të parë, shtator, nëntor, nuk kanë qenë shumë evidente, por sigurisht mori një hov në korrik, por tani po evidentohet qartë”, tha ai duke iu referuar të ardhurave shtesë në buxhetin e shtetit në monedhën vendase. “Duke u nisur edhe nga fakti që Banka e Shqipërisë është në një tkurrje monetare, pra nuk kemi ndonjë lehtësim sasior, aq më tepër kjo ofertë zvogëlohet në lekë në treg, çka në një farë mënyre i hedh më shumë benzinë zjarrit dhe forcon monedhën lekë”, shton ai.
Sipas tij, faktor kyç është edhe përmbushja e nevojave energjitike të vendit, gjë e cila ndikon në eksport.
“Presim nëse do të zbresë nën 10 lekë, i cili do të ishte një sinjal i fortë, që do të ndikojë edhe nga ana psikologjike për të rënë më shpejt seç duhet”, tha ai.
Ju mendoni se në dhjetor do të zbresë nën 10 lekë?
“Do të varet gjithmonë nga madhësia e fondeve që do të duhet të shpenzojë qeveria shqiptare. Duhet të kemi të qartë një gjë, që veç këtyre 50 miliardë lekëve që janë tepër, pra janë të pa shpenzuara në llogari të qeverisë pranë Bankës së Shqipërisë, kemi edhe 30 miliardë lekë të pakonsumuar”, thekson ai.
Ai theksoi se qytetarët që kanë kursime në monedhën europiane duhet të tregojnë kujdes të paktën deri në përfundim të këtij viti dhe të mos kryejnë këmbime të panevojshme.
Intervista e plotë:
