Ish kryeministri, Sali Berisha ka akuzuar qeverinë se ka dekonspiruar operacionin e SPAK, ku u arrestuan prokurorë, ish-shefa policie e biznesmenë të dyshuar si të lidhur me grupe të strukturuara kriminale.
Berisha thekson se operacioni dështoi për shkak të autoriteteve shqiptare, të cilat sipas tij i dhanë sinjale kriminelëve të arratiseshin.
“Dekonspirim kriminal i operacionit të kërkuar nga Europol dhe SPAK: Ja mbathin pasi njoftohen, 9 nga 15 kriminelët.
Europoli, bazuar në përgjimin e telefonave Sky, ECC dhe Encrochat kishte sjellë në Shqipëri dosjet e 15 kriminelëve shqiptarë trafikantë droge, prostitucioni, autorë vrasjesh, përdhunuesish. Por, në këtë operacion, nga 15 banditë u arrestuan vetëm 6, sepse 9 të tjerë, ndër të cilët dy anëtarë të klanit të partisë “Bajri”, ja mbathën siç është rregulli, “në drejtim të paditur”, shprehet ai.
Berisha nuk ka kursyer akuzat as për Ministrin e Brendshëm, të sapoardhur në detyrë, Taulant Balla. Këtë të fundit, Berisha e akuzon për lidhjen me krimin dhe shton se operacioni dështoi në masën 60 përqind.
“E vërteta është se operacioni, në masën 60% dështoi. Kjo, vetëm e vetëm se autoritetet shqiptare, të lidhura me bandat e partisë, i njoftuan banditët e tyre që t’ia mbathin. Ministri i krimit Balla, i njohur për lidhjet direkte me disa prej të arratisurve, vrapoi i pari të lavdërojë Policinë për operacionin, 60 përqind të dështuar, si për të thënë “mos kujtoni se i kam njoftuar unë”, shton ai.
SPAK ka vënë në pranga Oltion Bistrin, i cili deri para pak ditësh ishte kreu i Forcave Operacionale në Drejtorinë e Përgjithshme të Policisë së Shtetit. Pas largimit të tij nga ky post, Bistri u emërua specialist në drejtorinë e krimeve e ndërsa më heret ai ka mbajtur edhe pozicione të tjera të larta.
Në pranga ka rënë gjithashtu edhe drejtuesi i prokurorisë së Kukësit, Xhevahir Lita si dhe biznesmeni i lojërave të fatit dhe të ndërtimit ,Pëllumb Gjoka. Pas hetimeve janë arrestuar gjithashtu edhe anëtari i bandës së Bajrave në Shkodër, Astmer Bilali, ish-efektivi Ardit Hasanbegaj dhe Edmond Preka, ky i fundit shoqërues i biznesmenit Gjoka.
