Gjermania do të vendosë taksë mbi pijet freskuese me sheqer nga viti 2028, në kuadër të një pakete të re reformash shëndetësore të miratuar nga qeveria, me qëllim luftimin e obezitetit dhe uljen e presionit mbi sistemin shëndetësor.
Të ardhurat nga kjo taksë, të cilat vlerësohen rreth 450 milionë euro, do të drejtohen drejtpërdrejt në sistemin shëndetësor, dhe jo në buxhetin federal. Ato do të përdoren për programe parandaluese, përfshirë promovimin e shëndetit në vendin e punës dhe iniciativa që synojnë popullsinë në tërësi.
Detajet e taksës, përfshirë nivelin e saj dhe mënyrën e zbatimit, ende nuk janë finalizuar dhe mbeten në diskutim.
Propozimi vjen pas mbështetjes në rritje të opinionit publik dhe partive politike në Gjermani për masa më të forta kundër konsumit të lartë të sheqerit. Sipas një sondazhi të Forsa-s, rreth 60% e qytetarëve mbështesin një taksë të tillë.
Kryeministri i landit Schleswig-Holstein, Daniel Günther, i cili ka qenë ndër propozuesit e masës, ka deklaruar më herët se “sheqeri i tepërt i sëmur njerëzit” dhe rrit kostot për ekonominë dhe sistemin shëndetësor.
Edhe pse fillimisht kishte rezistencë nga disa përfaqësues të CDU-së, më pas mbështetje kanë shprehur edhe deputetë të këtij partie, si dhe të Gjelbërve dhe Socialdemokratëve.
Sipas Organizatës Botërore të Shëndetësisë, më shumë se 100 vende në botë tashmë aplikojnë taksa të ngjashme për pijet me sheqer, të cilat në disa raste kanë ndikuar në uljen e konsumit dhe parandalimin e sëmundjeve si diabeti.
/vizionplus.tv
