Kryeredaktori i lajmeve në Vizion Plus, Roland Zili, e ka cilësuar një befasi të kryeministrit Edi Rama lëvizjet e sotme në kabinetin qeveritar.
I ftuar në studion e Quo Vadis të moderatores Pranvera Borakaj, Zili tha se kalkulimet Rama ka pasur kohë t’i bëjë, por sot vendosi të surprizojë, për të çuar edhe një mesazh të drejtpërdrejtë ndërkombëtarëve.
Pjesë nga biseda:
Borakaj: Ishte e pritshme sot ndryshimet në qeveri?
Zili: Mendoj se është lëvizje e kalkuluar, por zoti Rama befason gjithmonë. Kjo është një lojë; nuk kanë rëndësi lojtarët, rëndësi ka që loja të vijojë për një skuadër. PS është një skuadër e madhe. Nëse e sheh në një vështrim të thjeshtë, të duket paradoksale: i futi ministrat dhe deputetët në një mbledhje për të raportuar dhe befas, në fund, gjysmën e qeverisë e hedh tutje dhe shpall një qeveri të re. Kjo duket si nonsens. I lë njerëzit të flasin, pastaj i largon. Por zoti Rama, mos harroni, befasinë e ka element të punës së tij. Së dyti, ndryshimet në qeveri e përmbysin gjithçka, zhvendosin vëmendjen. Ndërkombëtarëve u thuhet se kam sjellë elementë të rinj, mesazh i qartë për ndërkombëtarët. Së pari, kam larguar zonjën Balluku.
Borakaj: Tre herë tha Rama sot që ka dhënë dorëheqjen?
Zili: Nuk quhet e shkarkuar. Ti do të lëvizësh njërin, fut edhe gjashtë të tjerë dhe duket normale. Së dyti, kemi qeveri me fytyrë të re, kemi njerëz që vijnë me karrierë në administratë. Së treti, e zhvendos frymëmarrjen edhe brenda partisë, që ne kemi një energji të re, për të mos pasur stresin përballë drejtësisë. Elementi tjetër që zoti Rama mund ta ketë menduar si lëvizje politike për brenda është me llogari: që në ekip bëhen ndryshime, por loja vijon. Së dyti, çliron një marrëdhënie të tensionuar edhe me ndërkombëtarët. Së treti, indirekt është një lloj çlirimi. Së katërti, garancia që dha zoti Rama sot për drejtësinë është një sinjal për atë që parashikohet të ndodhë në të ardhmen. Kjo tregon që Rama kërkon medoemos të bëjë atë që do.
