Në procesin ndaj Leonard Dukës, i akuzuar për ekzekutimin e ish- policit Santiago Malko pati tensione të forta. E ëma e viktimës së atentatit të gushtit të 2019 kërkoi dënim kapital për Dukën që konsiderohet si porositës dhe organizator i vrasjes së djalit të saj.
“Leonard Duka më ka vrarë djalin. Më solli Erlis Dukën dhe Ilir Selmanin dhe me tha që s’kam gjë me Santin, por doli e me vrau djalin në mes të rrugës. Unë nuk dua dënim të përjetshëm, dua dënim me vdekje për këtë”, tha ajo.
Ndërkaq, avokatja e tij, Melina Gjeta, thotë se SPAK e ka të pabazuar procesin hetimor me deduksione dhe paragjykime, ndërsa në seancë foli edhe i dyshuari kryesor, Leonard Duka.
“Deklaroj që jam i pafajshëm dhe prokurori nuk ka asnjë fakt kundër meje. Kjo është e montuar nga policia që të më dëmtojnë mua. Kam besim te drejtësia”, tha Leonard Duka.
Ndërkaq, të mërkurën, në 21 janar do jepet vendimi nga Gjykata kundër korrupsionit dhe krimit të organizuar.
Në korrik të vitit të kaluar Prokuroria e Posaçme kërkoi 157 vite burg për klanin “Duka” dhe anëtarët e tij.
Vrasja e Santiago Malkos, ndodhi për shkak të prishjes së pazareve të lojërave të fatit, një konflikt që kishte nisur që më herët mes dy miqve të dikurshëm Leonard Duka e Ervis Martinaj. Në dosje thuhet që Malko dhunoi të atin e Leonard Dukës, ndaj vëllezërit morën hak duke e ekzekutuar me breshëri plumbash në zonën e “Xhamllikut” në kryeqytet.
