Liderë të Ballkanit Perëndimorë, zyrtare të Bashkimit Europian dhe investitorë të huaj u mblodhën në Tiranë në Samitin e Forumit të Investimeve BE-Ballkani Perëndimor.
Fjala hapëse e këtij takimi të nivelit të lartë, u mbajt nga Presidentja e Komisionit Europian Ursula von der Leyen dhe Kryeministri Edi Rama, i cili kishte dhe një mesazh për vendet e unionit, që sipas tij duhet të ndryshojnë qasjen për rajonin.
“Po përvijohet një hartë e re, jo në letër, por në hapin tonë të të ardhurit bashkë dhe më afër BE. Fluksi i turistëve dhe investimet europaine janë zgjim i një ideje të thjeshtë, por të fuqishme, që Ballkani Perëndimor nuk është oborr i pasmë i Evropës dhe as lagjja e tij e dorës së dytë, por një horizont i ri. Një horizont që Evropa mund të ri zbuloje shkathtësinë, oreksin e saj dhe dashurinë për jetën dhe paqen”, tha Rama.
Sa i përket investimeve të unionit, kreu i qeverisë shqiptare theksoi se Ballkani Perëndimor është vendi ideal për të ndërtuar të ardhmen.
“Nuk duhet shumë shkencë, për të kuptuar që Ballkani Perëndimor, mund të bëhet laboratori i Europës, për të testuar dhe për të provuar të ardhmen. Le të themi troç Europa nuk e ka luksin, që të varet nga ajo që nuk e kontrollon. Duhet ta kthejmë potencialin në qëllim dhe ta kthejmë këtë rajon në zonën e transformimit të Evropës”, u shpreh Rama.
Në panelet e këtij takimi të nivelit të lartë morën pjesë investitorë nga vende të ndryshme e mes tyre ishte edhe CEO i “Concord Investment”, Artan Dulaku. Ai vuri në dukje resurset e mëdha që ofron Shqipëria dhe rajoni.
“Nëse ne duhet të ecim përpara duhet të ristrukturojmë ekonominë tonë dhe të përfshihemi në ato që janë mënyra të zgjuara për të bërë biznes dhe që është, koordinim midis sektorëve kyç si energjia, energjia e rinovueshme, dhe pse të mos lëvizim drejt disa mjeteve financiare, strukturës së re që i nevojitet vendit”, tha Artan Dulaku, CEO i “Concord Investment”.
Ndërsa interesi i të huajve sa vjen e rritet, ka nevojë për disa zgjidhje që mund të ofrohen.
“Do t’ju sjell një shembull. Duke folur për mikpritjen, kemi vënë re se kërkesa për të qenë të pranishëm në Shqipëri, që nga 20 rrjete hotelesh në Evropë, është shumë e lartë dhe përgjigja është e ngadaltë dhe duhet të përshpejtohet disi. Do t’ju jap një shembull se çfarë mund të bëjë qeveria lokale. Qeveria lokale në thelb mund ta zgjidhë çështjen e pronësisë së tokës, e cila është një çështje e madhe dhe asnjë e huaj nuk mund ta zgjidhë atë me mjetet e veta. Qeveria lokale mund t’ua përkthejë nevojat lokale partnerëve ndërkombëtarë”, deklaroi z.Dulaku, CEO i “Concord Investment”.
Projektet që pritet të mbështeten në rajon arrijnë vlerën e mbi 4 miliardë eurove.
/vizionplus.tv
