Qeveria dhe Banka e Shqipërisë prezantuan programin prej 25 miliardë lekësh që do të jetë në dispozicion të bujqësisë, për të nxitur kreditimin e këtij sektori. Përmes kësaj linje të re financimi, bizneset e vogla dhe të mesme do të kenë mundësi të marrin kredi bankare me norma interesi nga 2-3.5%, ndërsa qeveria do të jetë garantore e huasë.
“Me mirëkuptimin e plotë për ngurrimin, por pres që me mbështetjen e Bankës Qendrore dhe bankat shumë nga arsye e ngurrimit do të kapërcehen. Kemi një produkt të kombinuar mes lonjës së re të financimit të BSH dhe mbështetjes që qeveria do të japë duke arritur faktikisht që përmes garancisë sovrane të mbulojë 70% të principalit të kredisë, e kombinuar me programin e bankës, ne mund t’ju themi atyre që kërkojnë më shumë financim në sektorin e bujqësisë se norma e interesit do të jetë vërtet shumë shumë tërheqëse. 70% i ulur i kërkesave për kolaterale do të jetë një lehtësim shumë i madh për bankat, që në mënyrë të përsëritur në takimet tona kanë bërë të qartë gatishmërinë për të mbështetur”, tha kryeministri Edi Rama.
“Kredia për sektorin bujqësor më pak se 2% të kredisë bankare për bizneset. Ky program është në përgjigje të shqetësimeve të biznesit dhe të analizave tona. Biznesi mikro, i vogël dhe i mesëm përbën shtyllën kurrizore të ekonomisë shqiptare, ky sektor është 4 herë më pak i kredituar se biznesi i madh dhe korporata. Programi i financimit të këtyre bizneseve ofron mundësi për një hov cilësor për këto biznese, 25 mlnd lekë për të mbështetur kreditimin e bizneseve mikro, të vogla dhe të mesme. Ofron mundësi për uljen e ndjeshme të kostos së kredisë për këto biznese, 2-35%”, tha guvernatori i Bankës së Shqipërisë, Gent Sejko.
Bizneset do të kenë mundësi të aplikojnë për kredi duke filluar nga dhjetori i këtij viti. Gjatë kësaj kohe, bankat kanë detyrë të identifikojnë subjektet që mund të jenë përfitues të programit. Shuma maksimale e huasë që një biznes mund të marrë për qëllime investimi është 25 milionë lekë, me një afat shlyerje 3-5 vjet./vizionplus.tv
