Netanyahu paralajmëron Iranin: Mos tentoni të pengoni zgjedhjet në Izrael

Kryeministri izraelit, Benjamin Netanyahu, ka paralajmëruar Iranin dhe aleatët e tij që të mos tentojnë të ndërhyjnë në zgjedhjet parlamentare që do të zhvillohen të martën në Izrael.

Në një videomesazh të publikuar nga zyra e tij, Netanyahu deklaroi se shërbimet izraelite të inteligjencës kanë informacione që sugjerojnë se Irani dhe grupet aleate të tij mund të tentojnë të kryejnë sulme me qëllim pengimin e procesit zgjedhor.

“Mos na vini në provë. Do të përballeni me kundërpërgjigje joproporcionale”, paralajmëroi Netanyahu, duke iu drejtuar autoriteteve iraniane.

Kryeministri izraelit, i cili synon të sigurojë një mandat të ri në këto zgjedhje, nuk dha detaje të mëtejshme mbi natyrën e kërcënimeve të mundshme.

Deklaratat e tij vijnë në një klimë të tensionuar mes Izraelit dhe Iranit, ndërsa siguria e procesit zgjedhor mbetet një çështje e rëndësishme për autoritetet izraelite.