Zyrtarja e lartë amerikane takon Dritan Abazoviç: Duhen reforma ekonomike dhe luftë korrupsionit

Ndihmës Sekretarja amerikane e Shtetit për Çështjet Europiane dhe Euroaziatike, Karen Donfried vizitoi Podgoricën ku u takua me kryeministrin Dritan Abazoviç, në ditën e tij të parë të punës në krye të ekzekutivit të ri.

Zyrtarja e lartë theksoi rëndësinë e bashkëpunimit në Mal të Zi si dhe luftën kundër korrupsionit.

KAREN DONFRIED

NDIHMES SEKRETARE E SHTETIT, SHBA

 

“Ndërsa qeveria e re fillon mandatin e saj, Shtetet e Bashkuara presin që të gjithë deputetët malazezë të marrin pjesë plotësisht në punën e parlamentit, me qëllim zgjidhjen e çështjeve urgjente, duke përfshirë përmirësimin e situatës ekonomike dhe luftimin e korrupsionit”.

Zyrtarja e lartë e Departamentit të Shtetit zhvilloi edhe një takim me kryetaren e parlamentit të Malit të Zi, Danijela Gjuroviq, duke shprehur besimin se ajo do të veprojë me sukses për të arritur një konsensus dhe për të forcuar rëndësinë e legjislativit.

Gjatë turit të saj pesëditor në vendet e Ballkanit Perëndimor, ndihmës sekretarja Donfried e shoqëruar nga i dërguari i presidentit Biden në rajon, përforcoi edhe njëherë mesazhin se angazhimi i Uashingtonit në luftën kundër korrupsionit është i palëkundur.

Zyrtarët e lartë amerikanë gjithashtu nënvizuan se rajoni i përket Bashkimit Evropian dhe progresi me reformat demokratike mbetet thelbësor.