Komisioni Qendror i Zgjedhjeve ka miratuar fletën e votimit për zgjedhjet e parakoshme në Bashkinë Kukës. Në një njoftim zyrtar bëhet me dije se kandidati i Partisë Socialiste, Albert Halilaj do të mbaje numrin 1, ndërsa kandidati i “Bashkë Fitojmë”, Emri Vata numrin 2.
“Komisioneri miratoi rezultatet e shortit, sipas të cilit rezultoi se Partia Socialiste e Shqipërisë do të renditet e para në fletën e votimit ndërsa koalicioni “Bashkë Fitojmë” do të renditet i dyti.
Gjithashtu, Komisioneri miratoi përmbajtjen e fletës së votimit për kandidatet për Kryetarin e Bashkisë Kukës, ku z. Albert Halilaj i propozuar nga PS do të ketë numrin 1 (një) në fletën e votimit dhe z. Emri Vata i propozuar nga BF do të ketë numrin 2 (dy)”, thuhet në njoftim.
Zgjedhjet e pjesshme për Kryetar të Bashkisë Kukës, do të zhvillohen në datën 24 Shtator 2023, pas shkarkimit të ish kreut, Safet Gjici.
