Detaje të tjera kanë dalë në dritë nga vrasja e trefishtë e ndodhur mbrëmjen e 3 shkurtit, në periferi të qytetit të Elbasanit. Sipas Prokurorisë, pjesëtarë të fisit Çapja, të cilët ishin edhe shënjestër e atentatit mafioz, u monitoruan nga një automjet i cili qëndronte në distancë, përballë lokalit, në zonën e kodrës së Krastës.
Këto zhvillime të reja për ngjarjen e rëndë, ku humbën jetën Agron Çapja, Eno Bedalli dhe Ardit Sinakolli, kanë bërë që ekspertët e krimeve të rënda, të arrijne në konkluzionin se, atentatorët kishin mbi 2 ditë që kishin nën vëzhgim miqtë dhe të afërm të fisit Çapja. Për këtë ngjarje, u mor në pyetje edhe një banor i zonës së Krastës, i cili fillimisht deklaroi në drejtorinë e policisë së Elbasanit se kishte parë një automjet të parkuar shumë pranë banesës së tij, madje kishte folur edhe me personat të cilit qëndronin brenda tij. Por personi në fjalë, identiteti i të cilit nuk bëhet publik, nuk ka dhënë më shumë detaje, pasi i druhet një hakmarrje të mundshme. Nga ana tjetër, edhe agjentët e shërbimit Informativ, kanë marrë orientime të posaçme për të hetuar automjetin, i cili kishte parkuar shumë pranë vendit ku ndodhi krimi i rëndë. Dy janë pistat kryesore të prokurorisë deri në këtë fazë të hetimit, e para është ajo e hakmarrjes dhe e dy lidhet me konfliktet e ndodhura në qytetin e Elbasanit muajt e fundit.

Leave a Reply

Your email address will not be published.