Një i burgosur 20-vjeçar francez, i cili u arratis javën e kaluar nga burgu duke u fshehur në valixhen e një shoku të qelisë që po lirohej, është arrestuar të hënën në mëngjes pranë qytetit Lyon, kanë bërë të ditur prokurorët.
Ai u kap ndërsa po dilte nga një bodrum në zonën Corbas, afër Lyonit. Shoku i tij, që e ndihmoi në arratisje, ende nuk është kapur.
Arratisja ndodhi të premten. I burgosuri ishte duke vuajtur dënimin për vrasje si pjesë e një grupi kriminal dhe për shkelje të ligjit mbi armët. Përveç kësaj, ai ishte nën hetim edhe në një tjetër çështje që lidhej me krimin e organizuar, sipas një burimi pranë hetimit për AFP-në.
Drejtori i administratës së burgjeve, Sébastien Cauwel, deklaroi për BFMTV të dielën se arratisja ishte rezultat i një “grumbulli gabimesh” dhe “një sërë dështimesh serioze” në sistem.
“Kjo është një ngjarje jashtëzakonisht e rrallë, e paprecedentë për administratën tonë,” tha ai.
Ndërkohë, muajin e kaluar, Dhoma e Avokatëve në Lyon kishte ngritur shqetësime lidhur me mbipopullimin në burgun e Lyon-Corbas. Sipas BFMTV, më 1 maj 2025, në këtë burg ishin të burgosur rreth 1,200 persona, ndërkohë që kapaciteti i tij është vetëm për 678.
/vizionplus.tv
