Veliaj pret Kristi Ramadanin, i riu u shpall nënkampion i Evropës në peshëngritje

Peshëngritësi Kristi Ramadani, i shpallur dhe nënkampion i Europës u prit në një takim nga kryebashkiaku Erion Veliaj, i cili vlerësoi suksesin dhe sakrificat e sportistit.

“Na ke nderuar sepse nuk ngrite vetëm peshat fizike të peshëngritjes, por ngrite edhe zemrat tona peshë dhe flamurin tonë lart. Për këtë të jemi vërtet Mirënjohës! E kuptoj që ti e ke pasion dhe nuk e bën këtë me detyrim. Ti nga çdo pore lëshon energji të mirë, sepse e bën me zemër, me shpirt, sigurisht edhe me muskuj dhe përgatitje fizike. të jam mirënjohës, ty të parit, sepse e ke dedikimin e jetës tënde dhe prej këtij dedikimi edhe Shqipëria lëvdohet sadopak”, tha Veliaj.

Nënkampioni i Europës, Kristi Ramadani u shpreh se kjo është një ëndërr e bërë realitet dhe falënderoi Bashkinë e Tiranës për mbështetjen.

“Kam që fëmijë që e ndjek këtë ëndërr, por ta bësh realitet ëndrrën tënde, është ndjesia më e bukur që kam ndjerë deri tani. Ju falënderoj për këtë pritje që më bëtë, sepse më rikthyet edhe njëherë emocionin e mirë që përjetova. Ndihem mirë që jam pjesë e Klubit Tirana”, tha Ramadani.

Sportisti i Tiranës, i dhuroi Shqipërisë dy medalje argjendi në Europianin e Peshëngritjes, të mbajtur në Bullgari pak kohë më parë