BKH ndalon administratorin e inceneratorit të Elbasanit, Leli Kaja

Administratori i kompanisë koncesionare “ECO-ELB”, Leli Kaja, është vënë në pranga nga agjentët e BKH-së në lagjen “Fushë Mbret” të Elbasanit.

Më herët, Prokuroria e Elbasanit, në bashkëpunim me Policinë e Shtetit, kishte ndërmarrë një operacion të gjerë kontrollesh në kuadër të një hetimi penal për abuzim financiar me inceneratorin e Elbasanit dhe kompaninë “ECO-ELB”.

Me urdhër të Prokurorisë dhe në zbatim të vendimit të Gjykatës së Elbasanit, janë ushtruar 14 kontrolle në banesa të zyrtarëve dhe përfaqësuesve të përfshirë në këtë çështje, mes tyre edhe administratori i kompanisë koncesionare “ECO-ELB”, Leli Kaja.

Kontrollet janë kryer pasi Prokuroria kishte përfunduar fazën e marrjes në pyetje të 43 personave, të cilët ishin thirrur për të dhënë shpjegime lidhur me funksionimin dhe menaxhimin financiar të inceneratorit.

Hetimi është regjistruar për veprat penale “Shpërdorimi i detyrës” dhe “Keqmenaxhimi i mbetjeve”, ndërsa burime pranë Policisë së Elbasanit bëjnë me dije se hetimi ka avancuar ndjeshëm.

/vizionplus.tv