U bllokua për 26 orë në një shpellë në Itali, shpëtohet me sukses 31-vjeçari pas një operacioni të vështirë
Një 31-vjeçar është shpëtuar pas 26 orësh i bllokuar në një shpellë në Sardenjë të Italisë, pasi një shembje shkëmbinjsh bllokoi daljen e saj të dielën, më 11 tetor.
Luca Olmeto ndodhej rreth 10 metra nën tokë, në shpellën Gorropeddu, në pjesën qendrore-lindore të Sardenjës, kur ndodhi shembja që i preu rrugën e daljes.
Ai po eksploronte shpellën së bashku me partneren e tij, e cila ndodhej disa metra pas tij. Gruaja arriti të shmangte shembjen, doli e padëmtuar dhe njoftoi menjëherë autoritetet.
Pas alarmit, ekipet e shpëtimit nisën një operacion të vështirë për largimin e shkëmbinjve që kishin bllokuar kalimin e ngushtë. Puna vijoi pa ndërprerje, ndërsa 31-vjeçari mbeti i bllokuar në brendësi të shpellës.
Gjatë gjithë operacionit, ai qëndroi i vetëdijshëm dhe arriti të komunikonte me shpëtuesit, duke u dhënë atyre mundësinë të ndiqnin gjendjen e tij deri në momentin e ndërhyrjes.
Pas rreth 26 orësh pune, shpëtuesit arritën ta nxirrnin në sipërfaqe, të hënën pasdite. Ai iu dorëzua menjëherë personelit mjekësor, i cili i dha ndihmën e parë dhe organizoi transportimin e tij me helikopter drejt spitalit.
Në operacion morën pjesë zjarrfikësit italianë dhe ekipet e specializuara të shpëtimit në shpella.
Pas më shumë se një dite ankthi, aventura e speleologut 31-vjeçar përfundoi me sukses, falë ndërhyrjes së ekipeve të shpëtimit.
